مطعم ينظم حفل إفطار لـ«الناس الرايقة»: هتاكل وانت مدلدل رجليك فى المية

11:53 م | الثلاثاء 29 مايو 2018

على أنغام الموسيقى الهادئة المختلطة بصوت خرير البحر، ينظم أحد المطاعم الشهيرة فى جزيرة الجفتون بالغردقة، حفلات إفطار داخل مياه البحر الأحمر، حيث تتراص الترابيزات والكراسى بشكل منظم ومثبت فى المياه، لتجذب السياح من المصريين والأجانب على تناول وجبات الإفطار فى جو مختلف بعيداً عن ضوضاء وصخب الحياة وضغوط العمل بالقاهرة.

تفتح الجزيرة أبوابها للزوار منذ 10 سنوات، ويتم الوصول إليها عبر مراكب، حيث تبعد عن الغردقة بنحو ساعة ونصف الساعة، ويحرص الكثير من سياح الغردقة على زيارتها خاصة فى الأيام شديدة الحرارة لينعموا بطقس بارد: «الناس بتقعد تاكل باللبس اللى يعجبها، سواء لبس البحر أو اللبس اللى هى بتفضله، وبيستمتعوا جداً وهما فى وسط الميه والأكل بينزل قدامهم وبياكلوا فى هدوء»، بحسب إيهاب دندش، مدير المطعم، الذى يفاجئ الزوار، بحفلات غنائية ورقص على شواطئ الجزيرة.

تستقبل الجزيرة الزوار ليوم واحد فقط، حيث لا يوجد مبيت، وتقتصر الرحلة إليها على تناول الطعام فقط، ويتراوح سعر الفرد وفقاً للطعام المقدم إليه ما بين 450 و550 جنيهاً: «كل ما كان العدد كبير، كل ما السعر بيقل، وبيبقى وجبة وبياخدوا جولة بالمركب فى الجزيرة، وبيقدروا يقضوا اليوم من الشروق لحد المغرب بمجرد ما الشمس بتروح اليوم عندنا بيخلص»، ويصنف «إيهاب» زوار الجزيرة بأنهم من أصحاب الطبقات الراقية، التى تسعى ما بين الحين والآخر إلى الحصول على قسط من الراحة: «كمان أغلب زواره من السياح الألمان والإنجليز لأنهم أكتر ناس بتحب الطبيعة وتنعزل عشان تبقى براحتها».