«العزومات» تزيد من الإسراف فى الطعام.. ربات البيوت: «شهر فى السنة»

09:39 م | الاثنين 28 مايو 2018

تلتف أسرة عبير عاصم، المكونة من ستة أفراد، حول مائدة الطعام التى امتلأت عن آخرها، داخل منزلها فى مدينة السادس من أكتوبر، تجلس «عبير»، طالبة جامعية، وسط أخواتها وأبويها بعدما انتهت من إعداد الطعام مع والدتها تقول: «ماينفعش الأكل بتاع الغدا فى الأيام العادية يكون هو نفسه فطار رمضان، بالعكس لازم يكون فيه تنوع ودى حاجة اتربينا عليها من زمان ودى من أهم سمات رمضان فى الأكل وكمان أنا وماما بنحب نزود شوية عشان لو حد جه فجأة نبقى عاملين حسابه»، هكذا تفسر سبب طهوها كميات كبيرة من الطعام خلال الشهر الكريم. وتتابع: «طبعاً فيه أكل بيتبقى وبيبقى زيادة وده بنشيله فى التلاجة ولما مش بيتاكل فيه حاجات بضطر أرميها لأن أخواتى مابيحبوش ياكلوا أكل بايت ولو كلوه يوم مبياكلهوش فى اليوم التانى».

فيما أوضحت مروة حسين، 32 عاماً، وتسكن فى منطقة فيصل، أنها لا تقوم بإعداد كميات كبيرة من الطعام فى رمضان سوى فى عزومات الأهل والأصدقاء، مبررة ذلك بقولها: «ماما دايماً كانت بتقول لى الأكل يبقى زيادة ويقعد فى التلاجة أحسن ما نعمل قليل أو على القد والناس تقوم جعانة». وتوضح أنها تخزن الطعام المتبقى فى الثلاجة ثلاثة أيام فقط ثم ينتهى به الحال كطعام للدجاج الذى تقوم والدتها بتربيته.

بينما تستنكر نهى زين، السيدة الأربعينية، ما تقوم به ربات البيوت فى رمضان من استهلاك كميات كبيرة من الطعام دون فائدة، وتوضح أنها تملك صفحة على موقع «فيس بوك» تقوم من خلالها بتسويق الطعام غير المطهى، ويزداد الطلب بشكل كبير استعداداً لشهر رمضان وتقول: «أكتر شهر بحقق فيه نسب بيع عالية هو شهر رمضان ومع إنى بكسب كويس فى الشهر ده بس بستحرم جداً كمية الأكل والأصناف الكتير اللى الناس بتطلبها، يعنى واحدة وجوزها وعندها بنتين صغيرين بتطلب منى أكل كتير جداً مش متناسب مع عدد أفراد أسرتها وببقى عارفة إن أغلبه هيترمى». وتضيف: «ده إسراف، وبحس إن الناس بالأكل اللى بيعملوه وبيشتروه إنهم بياكلوا فى آخر زادهم».

وتطالب «نهى» بتوفير ثلاجات فى الشوارع، خصوصاً خلال شهر رمضان، لوضع الطعام المتبقى من الإفطار فيها ليأخذه ذوو الحاجة والمتسولون ممن لا يتوافر لديهم المال لشرائه.