الموضة السنادى: شابوهات «ليالى أوجينى» وحجاب «مى عز الدين»

11:38 م | الأحد 27 مايو 2018

اتخذن من الاستايل الخاص ببطلات الدراما موضة لهن، مع بداية السباق الرمضانى، تسارعت الكثير من الفتيات لتقليد بعض الأزياء المميزة لنجماتهن المفضلات، بعضهن أعجب بطريقة حجاب مى عز الدين بطلة مسلسل «رسائل» ووصفنها بالأنيقة والمحتشمة، والبعض الآخر أعجب ببساطة وكلاسيكية ملابس بطلات مسلسل «ليالى أوجينى»، وشرعن فى ارتداء قبعات الرأس التى كانت منتشرة فى سبعينات القرن الماضى.

اعتادت نيفين عاطف، على الخروج عن المألوف، فهى طيلة الوقت تبحث فى الموضة القديمة وتضيف إليها بعض اللمسات الحديثة، حاولت التجديد بارتداء قبعات الرأس الكلاسيكية فى السهرات والمناسبات، تارة تظهر بها فى بعض الحفلات الليلية، وأخرى ترتديها فى جلسة تصوير مختلفة: «بحب الموضة بتاعة زمان، هدومهم وكل حاجة كانوا بيلبسوها كانت راقية وبسيطة، وبيجى عليا وقت بلبِس فيه فستان شيك على الشابو، لبس جميل بيدى للبنت شكل رقيق وراقى جداً زى بنت باشا أو هانم».

حب «عالية» للموضة القديمة وتعلقها بها جعلها تقبل على القيام بجلسة تصوير بقبعة الرأس: «لبستها عشان أتصور بيها بس، بحس فيها بأناقة وأنوثة، بس مخرجش بيها لأنها موضة قديمة ومحدش متعود عليها دلوقتى».

{long_qoute_1}

وبعد تزايد الإقبال على ارتدائها مؤخراً، قامت شيماء محمود بتصميم أشكال مختلفة من القبعات وطرحها للبيع بأسعار تتراوح بين 60 و80 جنيهاً: «أنا بنفذ الشابوهات والجوانتيات بتاعة زمان بالطلب اللى عايزهم.. فيه بعض البنات بقت تلبسها كتجديد بدل الإيشارب تتحط على التربون وبيبقى لها شكل جميل».

منذ اللحظة الأولى التى شاهدت فيها نانسى زيدان، ربطة حجاب مى عز الدين بمسلسل «رسايل» انبهرت ببساطتها وسارعت بالبحث فى موقع يوتيوب لمعرفة طريقة لفها: «اللفة شيك وجميلة وبسيطة وبتبين الوش بشكل دائرى وصغير»، كل ما تحتاجه الربطة «بندانة» أسفل الطرحة لتسهل طريقة لفها وتثبيتها أطول فترة ممكنة: «البندانة قطن اللى بتتلف من تحت الطرحة بتدارى جزء كبير من الجبهة.. بس الحقيقة فى بنات كتير خايفة أن الطرحة تبقى موضة الصيف عشان مش هتناسب كل الوجوه»، لم يقتصر تقليد «نانسى» لـ«مى» على لفة الحجاب فقط، وإنما طريقة وضع الميك أب أيضاً: «لوك مى عز الدين عاجبنى جداً، لفة الطرحة والميكب، والاتنين مناسبين على وشى».

«مش أى موضة تتناسب مع أى وش وتنفع لأى مناسبة» كلمات هاجر دعبس، استايلست، عن الحالة الموجودة بين الفتيات مؤخراً: «هما بيعجبوا جداً بكل حاجة جديدة من غير ما يشوفوا هتناسبهم ولا لأ»، حيث يعد أصحاب الوجوه النحيفة الصغيرة هم الأكثر حظاً وتناسبهم طريقة حجاب مى عز الدين بالمسلسل: «ما تنفعش خالص مع بنت عندها خدود ووشها كبير»، وعن قبعة الرأس، فإنها ترى أنها تتناسب بشكل أكثر مع غير المحجبات: «مش هتبقى حلوة على إسبانش وكمان لازم تكون مع فستان مش فيه تطريز كتير.. لازم يكون فستان بسيط جداً».