اختراع من وحى الغلاء: هات سلك ولمبة واعمل مكنة الزبادى

12:11 ص | الأربعاء 23 مايو 2018

ارتفاع أسعار ماكينات تصنيع الزبادى عن الأعوام السابقة دفع البعض إلى تصنيعها يدوياً لبساطة الخامات المستخدمة فيها، هذا ما فعله محمد حسن، 24 سنة، حيث صنعها باستخدام أدوات بسيطة وموجودة داخل كل منزل، بغرض توفير شراء عبوات زبادى بعدد كل أفراد الأسرة، وفى الوقت نفسه الحصول على منتج صحى خالٍ من المواد الحافظة، وبتكلفة زهيدة لا تتعدى 25 جنيهاً.

الفكرة يشرحها «محمد»: «هتجيب علبة تلاجة بلاستيك بغطاء، مش هتكلفك أكتر من 10 جنيه، ومن عند أى كهربائى هتشترى متر سلك كهرباء، ولمبة صغيرة (سهارى) مع دواية وفيشة كهرباء بتكلفة مش هتعدى 15 جنيه، هتخرم غطاء العلبة من فوق، وتعدى السلك منه وتركب فيه اللمبة بالدواية، وبكده بقى عندك ماكينة صناعة زبادى فى البيت».

التجربة نفسها نفذها هيثم عبدالله: «أنا جيبت كيلو لبن دافئ (40 درجة)، وخلطته كويس مع علبة زبادى واحدة، وصبّيته فى 8 كبايات بلاستيك ورصيتهم فى العلبة، وقفلت العلبة وفتحت اللمبة عليهم أربع ساعات، وبكده أصبح عندى 8 كبايات زبادى جودتهم مضمونة لو اشتريتهم من بره هجيبهم بـ24 جنيه».

الفكرة التى انتشرت على الجروبات الخاصة بالأكل على «الفيس بوك»، أعجبت بها سهير جمال، وحاولت تطبيقها: «على فكرة أنا عملت الزبادى وسِبتها متغطية فى البلكونة لمدة ٣ ساعات بس مع الحر ده، بعد كده دخلتها التلاجة، والنتيجة كانت ممتازة، والطعم عجب الولاد، بقيت أعمله كل يوم، وبوفر أكتر من 10 جنيه يومياً».