مسحراتى
مسحراتى
عدونا ما انعطفشى للبشر والناس
وما قالش لكبيره يابا وعظّم الإحساس
ولا ضرب فى أراضى النور هرم وأساس
ولا زرع ست آلاف وحضن وغل القمح
ولا تبنّى ولا هزّ الهلال السمح
شهد التاريخ إن أعداء الوطن قتلوا
الأنبياء واليتامى، والعرب عدلوا
ولا حد قبل العرب بين كافة الأجناس
اصـحى يا نايم
وحّد الدايم
السعىُ للصوم
خيرٌ من النوم
دى ليالى سمحة
نجومها سبحة
اصـحى يا نايم
يا نايم اصحى
وحّد الرزاق
انت الأمل
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحّـراتى
مـنـقـّراتى
لا قلبى ريح
ما عاش فى قلبى
إلا الأمل…
وتسعه يونيو
كان فجر دنيا
كان ضىّ داوى
وكان أمل....
الشعب فارع
ملا الشوارع
قال يا حبيبنا
انت الأمل…
الشعب كلك
قايم يقول لك
الكلمه واحدة
وانت الأمل…
كبدى اللى عيط
رجع يغنى
والنور حضنّى
وانت الأمل…
المشى طاب لى
والدقّ على طبلى
ناس كانوا قبلى
قالوا فى الأمثال:
«الرجل تدب مطرح ما تحب»
