هبة أمين تكتب: ادحرج واجرى!!
![هبة أمين](https://watanimg.elwatannews.com/image_archive/840x473/4250136301525365452.jpg)
هبة أمين
عشان (الوطن قوته فى ناسه) دخلتها برجلى اليمين من غير محسوبية ولا حد اتصل بيا وقالى تحبى تشتغلى معانا لأن تقريباً محدش يعرفنى غير خمسة ستة..
أمى قالت لى «لو هتقعدى تستنى حد يتوسطلك يبقى هتفضلى محلك سر.. قدمى وانتى واثقة فى ربنا.. طول ما بتجتهدى وتعملى اللى عليكى يبقى ربنا مش هيسيبك»..
وبالفعل شرفت بأن أكون أحد جنود «كتيبة الوطن».. ليبدأ أهم وأفضل مشوار فى حياتى المهنية منذ 6 سنوات، يصاحبها عبارات «يابنت المحظوظة بتشتغلى فى الوطن.. تلاقيكى بتقفشى على قلبك قد كده».. وغيرها من عبارات الحسد التى كان يقابلنى بها البعض بسبب هذا المكان الذى وُلد كبيراً..
إيمانى دائماً بأن الحياة لا تأتى لك على طبق من فضة، ولكن يجب أن تمر بثلاث مراحل، إذا نجحت فى تخطى الأولى والثانية ستصل للثالثة بكل أريحية.
1- (ادحرج):
الصعوبات والعكوسات جزء من حياتنا، طول ما انت عايش على وش الدنيا هتقابل مشاكل وهتلاقى ناس كل مهمتهم إنهم يزهقوك، يحطوا عليك عقدهم النفسية، يلمّعوا نفسهم على حسابك، يزعلوك، يكسروك تكتئب، تتغير، تخسر نفسك واللى حواليك، طب الحل؟ تجرى تهرب منهم تفكر فى حاجة واحدة.. إزاى تنجح عشان يوم ما تلمع تبقى جاهز لمهمتك الجديدة؟!
2- (اجرى):
انت وشطارتك بقى.. يا إما تجرى فى دايرة مفرغة وتفضل طول الوقت عينك على المشاكل وإنك يا حرام الناس كلها ضدك وإن محدش بيقدرك وإنك تستحق مكانة أحسن لكن فيه ناس تانية أقل منك بتاخد فرصتها.. وتفضل فاكر إنك بتجرى عشان تحصلهم لكن الحقيقة انت مركز معاهم وواقف محلك سر.. يا إما تجرى بإنك تجتهد وتعمل اللى عليك وماتفكرش انت هتاخد كام أو هتكسب إيه، وطول ما انت مؤمن إن ربنا معاك وهيعوضك بطريقته، صدقنى غصب عن أى حد هتوصل للى عايزه..
3- (مرحلة الراحة)
دى مرحلة الراحة.. يعنى بعد ما تخطيت مرحلة الدحرجة والجرى ومخلتش حاجة تعطلك.. جه الوقت إن اللى حواليك يقدروك.. بس خلى بالك المرحلة دى مش سهلة برضه.. يعنى لمّا توصل متجيش على الناس اللى هما لسه فى مرحلة الدحرجة.. اوعى تتغر.. أحسن تقع مرة واحدة ومتلاقيش حد يسندك.. واعرف إنها مش دايمة لحد الله يخليك..