تقويم أسنان من الذهب «عيار 24»: فى فمى «كنز»

10:29 م | الأربعاء 21 مارس 2018

على الرغم من ارتفاع أسعار عمليات تجميل الأسنان بالتقويم، فإن طبيب أسنان فى مدينة الإسكندرية استحدث طريقة للحصول على أسنان متناسقة وجميلة لكنها أكثر تكلفةً، وهى تقويم الأسنان بالذهب عيار 24 بتكلفة تصل إلى 150 ألف جنيه، هذا ما فعله الدكتور محمود عرنوس فى عيادته الكائنة بمنطقة ميامى، ووجد إقبالاً من بعض الشرائح الاجتماعية المرتفعة.

«السنان بتفرح بالدهب وتتنطط وترجع مكانها بسرعة، ممكن بعد ما تخلص تقويم تسيحه وتعمله جنيهات دهب، وممكن يتقدم شبكة لعروسة، ممكن تحتفظ بيه كورث».. بعض المميزات التى ذكرها الطبيب لمرضاه حول التقويم الذهبى، الذى يقدم عليه خصماً خاصاً ليجذب إليه الأنظار: «الدهب غالى جداً خصوصاً دلوقتى، إحنا بنعمله بسعر 150٫099 جنيه». وبحسب الطبيب هناك إقبال عليه من أصحاب الدخول المرتفعة: «فيه ناس بتعمله للاستفادة منه فى حاجتين، أولاً شكل جميل فى الأسنان بدلاً من التقويم العادى، واستفادة مادية برضه لأنه لو المريض احتفظ بيه شوية وباعه بعد كده هيستفيد من الفرق لأن الدهب فى زيادة مستمرة».

فى البداية طرح «عرنوس» الفكرة كطريقة للدعاية، وكان يستبعد التنفيذ لارتفاع التكلفة، لكن عندما وجد استجابة من بعض المترددين على عيادته، واستفسارات كثيرة منهم عن التقويم الذهبى وأسعاره ومزاياه قرر تنفيذه: «يصنع الطاقم الذهبى من الستانلس ستيل المغطى بالذهب، وهو يعتبر صحياً على المرضى، ولا يضرهم فى شىء، كغيره من باقى أطقم التقويم التقليدية، هو بيتعمل بطريقة بسيطة، باجهز الطاقم الأول وبعدين باتفق مع محل مصوغات على التكلفة، وهو اللى بيطلى الطاقم بالدهب وبنركبه للمريض».