«حمص» يبيع فساتين زفاف على الرصيف: «بـ100 جنيه والمكياج عليّا»

10:49 م | الاثنين 19 مارس 2018

فساتين زفاف وسهرة على درجة كبيرة من الأناقة على رصيف ملىء بالأتربة والغبار. مشهد يبدو غريباً على من يزور لأول مرة «سوق التلات» بمنطقة المرج، على عكس المترددين على المكان، الذين يأتون خصيصاً كل ثلاثاء ليروا كل جديد يأتى به «حمص هوارة».

عناية فائقة يوليها الشاب العشرينى لبضائعه من ملابس السهرة، سواء فيما يتعلق بحداثة التصميمات، أو بنظافتها ورصها بانتظام، ولا ينسى عرض أدوات تجميل تتراوح أسعارها بين جنيهين ونصف و7 جنيهات ونصف، لاكتمال أناقة الزبائن.

يراهن «حمص» على الفساتين التى يعرضها كل ثلاثاء بالتزامن مع السوق الأسبوعية الشهيرة، من حيث الجودة والنظافة والسعر: «فساتينى نضيفة وزباينى عارفين ده، لأنى مش بابيعها مستعملة، أنا باخد بواقى المصانع والأتيليهات وأعرضها»، حيث يضع تسعيرة محددة لفستان الزفاف تصل إلى 100 جنيه، أما فستان السهرة فيتراوح بين 50 و80 جنيهاً: «أبو 80 جنيه بيبقى موديل السنة اللى فاتت، وأبو 50 بيكون أقدم لكن مش مستعمل».

يحرص «حمص» على شراء الفساتين وتنظيفها جيداً قبل عرضها على الزبائن فى الشارع: «اللى بييجى هنا السوق بيبقى على قده أوى، وبيبقى عايز حاجة تناسب الفلوس اللى فى جيبه، والفستان ماباكسبش منه غير 10 جنيه بالكتير، وفيه ناس بتشترى فساتين لليتامى والغلابة اللى مامعاهمش يشتروا لنفسهم». وعن أدوات التجميل التى يبيعها يقول: «بتبقى قطع متبقية فى المحلات، باشتريها بكميات وبابيعها بالقطعة، عشان الزبونة تشترى الفستان ومكياجه عليّا».