6 مواقف حقيقية للحسد :"واحد وقع عصفور بعينه والتاني وقع موتور عربية"

07:48 ص | الاثنين 19 فبراير 2018

يخاف الكثيرون في الوطن العربي من الحسد خاصة أنه مذكور بآيات في القرأن الكريم، ووصل الأمر إلى إصابة بعض الأشخاص بفوبيا الحسد.

وبالطبع يحتفظ كل شخص ببعض الحكايات عن أشخاص حاسدون سواء كان قابلهم بالفعل، أو عن طريق الحكايات.

وبعدما سأل أحد أعضاء جروب"جت في السوستة"عن مواقف عاشها أعضاء المجموعة للحسد "الوطن"رصدت لكم أطرف هذه التعليقات:

قال أحمد مجدي:"واحد عندنا من البلد مشهور بالحسد وشهدنا له حاجات كتير مرة دخل مسجد شاف كولمن كبير قال:

ياخويا الكولمن ده كبير ليه كده ..الخ

بعد ماطلع الكولمن اتشرخ من ورا ونقط مية

"مرة شاف واحد جاي بعربية حلوة عجبته فوانيس العربية سأل صاحبها عن تمنها ومشي الفوانيس فجرت قدام عنيهم".

و"مرة بوظ 3 مراوح جداد للجامع بعنيه قبل ما يتركبوا واللي حاول يركبهم وقع من ع السلمة واتشعلق في المروحة".

و"مرة سأل بابا عن مرتبه ... تاني يوم وهو مسافر ضاعت منه الشنطة بهدومها بكل حاجة، والدي اول مايشوفه بيعمل نفسه عيان ورجله وجعاه وليه مغامرات كتير بس الوقت لايسمح".

أما محمد يسري علق: "والله حصل بجد مش هزار ليا واحد صحبي معروف عنه إن عينه وحشة، كان في مره عربية لادا معدية من قدامه جديدة"زيرو" قال العربية دي لادا بس لسه زيرو.. العربية أخدت حفرة الموتور وقع منها".

كيمو حكى عن تجربة واقعية له لكنها مؤلمة:"حد قالي عينك حلوة بعدها بدقيقه بجد والله عصاية دخلت في عيني وعملت 6 عمليات والحمد لله ع كل حال".

أحمد عاطف حكى عن شخصية أسطورية في الحسد:"عندنا واحد وقع العصفور من ع سلك الكهربة اللي ف الشوارع متكهرب وهوا هوا نفس الشخص بيقول القطط مزاجها عال، وبسبع أرواح، عربية معديه فرمتها".

أما أحمد عبدالباري قال: "أنا مكنتش بصدق في الكلام ده لحد يوم كنا لسه فيه طلبة في الكلية، وكنا في الكافتيريا ومستنيين نتيجة الترم الأول تظهر في أي لحظة، وجه واحد وقف معانا كنت أول مرة أشوفه بس صاحبي اللي واقف جنبي قالي فلان ده خلي بالك منه علشان عينه وحشة، أنا بصيت له وابتسمت باستخفاف مش مصدقه.. المهم شوية وقلنا نجيب بيبسي من التلاجة وجبنا زجاجات بيبسي كلنا، لقيته بيمسك زجاجة اليبسي اللي معايا وبيقول حظك حلو زجاجتك ساقعة واللي معايا سخنة، أقسم بالله الزجاجة وأنا ماسكها في إيدي لقيت قعرها بينفصل عنها والبيبسي كله اتدلق على الأرض!! .. قلت قدر الله وما شاء فعل وممكن تكون صدفة .. وإحنا واقفين جه واحد صاحبنا وقف على باب الكافتيريا وزعق بعلو صوته أنه نجح وبتقدير، فلان اللي واقف جنبي ده سمعته بيقول ده ناجح بتقدير وإحنا بندعي نعدي صافي من غير ما نشيل مواد.. هووب الواد اتقلب على ضهره من غير ما حد يلمسه ووقع على دماغه وأغمى عليه.. أنا في اللحظة دي طلعت أجري بعيد عن الجدع وبقيت أشوفه في أي حتة أبعد عنه وأسيب المكان كله"