14 "حسرة" لـ"عمرو أديب" على الهواء بعد فوز الأهلي.. آخرها: "حاجة تنقط"

05:15 م | الاثنين 22 يناير 2018

"حتى لو النادي الأهلي راح لعب في الدوري الإنجليزي هايكسبوا بردوا.. ده النادي الأهلي.. أنا بس كل اللي أنا عاوزه افرحوا بهدوء.. خدوا الدوري بهدوء.. كل اللي بطلبه إنه بهدوء.. كل اللي أنا عاوزه نفسي أفرح" بهذه الكلمات عبر الإعلامي عمرو أديب، الذي يشجع نادي الزمالك، عن حسرته بتراجع أداء ناديه في مقابل تقدم النادي الأهلي، والتي كان آخرها أمس عندما فاز المارد الأحمر على مصر المقاصة بهدفين مقابل بهدف، بعدما كان الفريق المهزوم في طريقه لتحقيق الفوز.

"الوطن" في هذا التقرير، تستعرض بالفيديو 14 مشهدا له وهو يعرب عن حزنه لتراجع الزمالك، وتقدم النادي الأهلي.

فاز النادي الأهلي على نادي مصر المقاصة، مساء أمس، بهدفين مقابل هدف خلال المباراة التي جمعتهما على ملعب استاد القاهرة، ضمن منافسات الجولة التاسعة عشر من منافسات الدوري المصري، ليواصل فريق الشياطين الحمر ابتعاده بصدارة الدوري المصري عن غريمه التقليدي نادي الزمالك بحوالي 10 نقاط.

وكانت المبارة تسير في اتجاه فوز فريق مصر المقاصة على النادي الأهلي، بعد أن أحرز المقاصة هدفا في شباك حارس الأهلي محمد الشناوي من ركلة جزاء، إلا أن عدل جونيور أجاي مهاجم النادي الأهلي استطاع النتيجة وأحرز هدف التعادل، ثم أحرز وليد سليمان هدف الفوز للمارد الأحمر.

وعلق الإعلامي عمرو أديب، والمعروف بانتمائه لنادي الزمالك على فوز النادي الأهلي وتحول سير المباراة، كعادته مؤخرا بعد فوز النادي الأهلي بالبطولات أو المباريات الصعبة، وهزيمة الزمالك المتتالية وإهداره للبطولات.

وتزامنت أمس، بداية حلقة عمرو أديب في برنامجه "كل يوم"، المذاع على شاشة "أون لايف" مع انتهاء مباراة الأهلي، وعلق عمرو أديب على المباراة في مقدمة الحلقة بكل حسرة وألم.

وقال عمرو أديب: "بينما أحضر لهذه الحلقة شاء المولى أن يكون مكتبي جنب الأخوة بتوع الرياضة، وبقيت أعرف النتايج من صوتهم وأغلبهم الحمد لله أهلاوية".

وأضاف أديب: "مش مهم بستحمل وبآجي على نفسي.. بس اللي تعبني ياسادة اليوم إن عم نبيل الحلفاوي الفنان، وهو قاعد على تويتر كدا، بعد تعادل النادي الأهلي، وبعدين عم نبيل قرر إنه يخلص عليا فسأل الناس سؤال ياولاد تفتكروا مين هيجيب الجون التاني فلان ولا فلان ولا فلان؟".

وتابع أديب: "وبدأ الأخوة في النادي الأهلي كل واحد ينقي مين اللي هيجيب الجون، وبعد شوية وكأن الأمور بتحصل بالأمر المباشر من عم نبيل الحلفاوي والأهلاوية جه الجون التاني".

واستكمل أديب: "رد عليا عم نبيل الحلفاوي ما أنت عارف ياعمرو بالأمر المباشر.. هكذا يدار الدوري في مصر.. هكذا يفوز النادي الأهلي.. يقرر الأهلاوية أن يدخل الجون التاني.. وعمرو يضايق تاني.. وعمرو ينكد تاني.. كيف يحدث هذا؟".

وأضاف أديب: "الكلام ده موثق.. وكانو كما هيجيبوا الجون الثالث.. هل ده يعقل؟.. أنا أفهم إنه داري على شمعتك تأيد.. بلاش تضايقوا الناس التانية اللي تعبانة.. وليد جاب الجون وانبسطنا خلاص.. بلاش بقى الكلام ده الساحر والحاوي.. ليه ده كله؟".

واستكمل أديب: " ماتكسبوا زي ماتكسبوا.. إحنا وصلنا للمرحلة دي من الفرعنة والإفترا؟.. لماذا أنت شرير ياعم نبيل في النادي الأهلي.. قدر أخواتك اللي مش لاقيين.. قدر أخواتك اللي في المركز الرابع.. قدر أخواتك اللي ربنا مابيكرمهومش.. ده غحنا بنتمنى جون مابيجيش".

وتابع أديب: "حتى لو النادي الأهلي راح لعب في الدوري الأنجليزي هيكسبوا بردو.. ده النادي الأهلي.. أنا بس كل اللي أنا عوزه افرحوا بهدوء.. خدوا الدوري بهدوء.. كل اللي بطلبه إنه بهدوء.. خلوا عندكم إحساس بالناس التانية.. لأنه كدا هتتحسدوا وتخسروا.. وممكن الأهلي يتغلب الماتش الجاي لأنه دي بتبقى نفس".

واختتم أديب حديثه: "مبروك للنادي الأهلي.. هو أنا هفضل طول حياتي أبارك للنادي الأهلي".

ولم تكن تلك الواقعة لم تكن الأولى من نوعها التي يعبر فيها أديب عن حسرته على حال ناديه المفضل الزمالك، وحسده لأحوال النادي الأهلي والبطولات التي يحققها.

فقد قال الإعلامي عمرو أديب، في حلقته الأربعاء الماضي: "بقالي كام يوم قاعد أقرأ عن النادي الأهلي وإنجازاته واللي بيتعمل في النادي الأهلي خلال بطل يضايقني اللي بيتعمل في نادي الزمالك.. والتقدم اللي في النادي الأهلي.. النادي الأهلي اتفتحتله حاجة كدا اسمها الرئيس الشرفي للنادي الأهلي تركي آل شيخ، داعم للنادي بشكل كبير.. وفجأة بقالنا 15 يوم لاعيبة أقوياء.. ومشروع القرن للنادي الأهلي وهو استاد النادي الأهلي، أنا شوفت الإستاد اللي معمول للنادي الأهلي حاجة خيالية.. طب وإحنا ياعم تركي؟.. قاعد تشتريلهم لاعيبة.. وتجيبلهم استاد وصفقات.. ده إحنا أكتر من ربع النادي المصري.. اصلا الأهلي مش عاوز لاعيبة.. وعندهم 5 أستادات".

وفي حلقة 28 نوفمبر 2017 عندما استضاف رئيس النادي الأهلي الكابتن محمود الخطيب، أثناء فترة ترشحه لرئاسة النادي الأهلي، وقال في المقدمة: "الخطيب وقائمته عندهم طموح كبير للنادي الأهلي.. واضح أن النادي الأهلي هيفضل يكبر ومحدش هيقدر يقف قدامه.. وعندهم طموح إن النادي الأهلي يكبر ويبقى أعظم وأعظم وده شيء يضايقني أنا شخصيا".

وفي حلقة يوم السبت 2 ديسمبر 2017 تحدث أديب عن الانتخاابت الرئاسية، مطالبا بنزول مرشحين منافسين حقيين، لأنه يريد أن تكون الانتخابات بمنافسة حقيقية مثلما كانت انتخابات النادي الأهلي، التي كانت بين شخصيتين ثقيلتين، "والناس نزلت بأعداد غفيرة لأنها للأخر مش عارفين مين اللي هيكسب، وكل واحد ليه برنامج تقيل، وعلشان كدا الانتخابات دي كان لها شرعية، وهي دي الانتخابات.. انتخابات النادي الأهلي دي هي اللي إحنا عاوزين زيها.. وانا آسف ج دا إني بقول كدا".

كما علق أديب في حلقته يوم 8 يناير على مباراة القمة الأخيرة التي جمعت بين النادي الأهلي ونادي الزمالك في إطار منافسات الدوري العام والتي فاز بها النادي الأهلي بثلاثة أهداف مقابل لا شيء.

وقال أديب: "المرار مايشربوش إلا الزمالكوية ده حرام ومش عدل يجب أن يكون هناك شوية بل ريق.. اللي ينقط يا سادة، إنهم يقولوا لك عايزين نمشي حسام البدري، لأنه مدرب غير صالح ومش جايب انتصارات كويسة للنادي الأهلي، اللي ينقط إن مدرب الزمالك الجديد كان بيتوعد ويقول إنه محضر مفاجآت، أنا عندي اقتراح يريحنا لا تغيروا المدرب ولا اللاعيبة، غيروا جمهور الزمالك، فمحدش يكون مضايق ولا زعلان، 19 مدربا في 3 سنين، وأنا زهقت بفتح الهاء على رأي الإسكندرانية، المرار مبيشربوش إلا الزمالكوية ده حرام مش عدل".

وعلق عمرو أديب على أداء الزمالك: "أمي دعت عليا.. دي لعنة.. في حاجات كتير وحشة في حياتي قدرت أتغلب عليها: كنت تخين خسيت.. كنت مابعرفش اتعلمت إلا موضوع الزمالك ده.. وكل مرة أضايق نفس الضيق ونفس الزعل".

وقال أديب: "بتطلع أجيال بتشوف الأهلي بتكسب هيشجعه.. والأهلي بيخسر على طول هيشجع الزمالك على إيه؟.. الأجيال بتتناقص".

وقال أديب في نفس الحلقة: "كل مرة أهنئ النادي الأهلي وإدارته على استقرارهم.. ونفضل نقول عادي على أداء نادي الزمالك.. العيب مش في النادي ولا إدارته ولا لاعيبته.. العيب فيا أنا واللي زيي اللي مصرين على تشجيع النادي".

ولكن من المرات النادرة التي عبر فيها عمرو أديب عن سعادته بفوز النادي الأهلي كانت عندما فاز على الترجي 2-1 في دوري أبطال إفريقيا، وقال أديب خلال برنامجه "كل يوم" عقب انتهاء المباراة "النادي الأهلي ده أهم من السكة الحديد.. نادي القرن وكل قرن.. ألف مبروك للأهلي والله مبسوط فعلاً.. الأهلي نادي القرن.. ونهني كل لاعيبة الأهلي.. شيء يفرح. المصريين معندهمش غير الأهلي يفرحهم. وساعات قليلة الزمالك"،"من كل قلبي مبروك.. كنت عارف إن ما يقدر يعملها غير الأهلي.. وإن شاء الله نستناهم في المطار بالمزيكا".

وقبل نهاية تلك المباراة تزامنت مع بداية حلقته الجديدة من البرنامج، وقال أديب: "إن شاء الله الأهلي يواصل تقدمه وكل الناس بتتفرج على الماتش دلوقتي.. والله أنا متحمس الأهلي يكسب الماتش ده.. في روح غير طبيعية.. ونتيجة الأهلي دي مايعملهاش غير الأهلي.. وهي دي روح الفانلة الحمرا.. الجون التاني للأهلي غير طبيعية.. في حالتين بسمع زلزال في مصر لما الأهلي يجيب جون ولما الزمالك يدخل فيه جون".

وبعد هزيمة النادي الأهلي في النهائي، ظهر أديب بكل روح رياضية، وقال: "الأهلي خسر بشرف ووصل للنهائي.. بقولهم ماتزعلش.. دولاب البطولات اتملى ومكانشي في مكان للبطولة دي".

وتقاسم عمرو أديب حسرته مع الفنان عزت أبوالعوف "الزمالكاوي" في برنامج "القاهرة اليوم"، بشكل فكاهي بعد على هزيمة الزمالك من الأهلي 11 يناير 2009، قائلأ: "نادي الزمالك مابيكسبش ومفيش حاجة بتتغير وهي هي نفس الحكاية والموضوع والدنيا هي هي كل يوم".

وعلق أديب على فوز النادي الأهلي على فوز الأهلي بسداسية على النجم الساحلي التونسي في إطار منافسات دوري أبطال إفريقيا 22 أكتوبر 2017 بروح رياضية: "النادي الأهلي يصنع البهجة للمصريين، واللي عمله الأهلي النهاردة.. قدروا يفرحوا الناس وفرحت مصر.. شعبنا عنده رغبة في الحياة".