بالصور| أحمد جمال للمشككين: "أنا ماشي ورا حلمي.. ونجاحي اللي بيتكلم"
بالصور| أحمد جمال للمشككين: "أنا ماشي ورا حلمي.. ونجاحي اللي بيتكلم"
نشر الفنان أحمد جمال، منشورًا عبر حسابه الشخصي على "تويتر"، قال فيه: "أنا مش ناجح"، وتلاه منشور آخر له بصور مع جمهوره من حفلاته، معلقا: "أنا معنديش جمهور"، ونشر جمال صورة للجوائز التي حصل عليها: "أنا مش ناجح".
وترقب متابعو "جمال" توضيحا منه لهذه التغريدات غير المفهومة، وبعد مرور عدد من الساعات غرد "جمال" في منشور: "أنا عارف إنتوا مستغربين من آخر بوستات نزلت وبتسألوني ليه كل ده، أنا هقولكوا ليه.. بس أنا دلوقتي بكلم الشباب الطموح، اللي نفسه يحقق لنفسه مكان وكيان كبير لما حد يستفزك في نجاحك أو يحاول دايما يحبطك أو يوقفك، طبيعي يبقى ده الرد ويكون الرد بتعبك ومجهودك وشغلك، مش بالكلام".
وتابع "جمال": "حتى ولو كان المشوار لسه في أوله، الرسالة من البوستات اللي فاتت كانت واضحة، يمكن كنت عصبي شوية بس ده طبيعي ما كلنا بشر، وصدقوني الإنسان اللي عايز ينجح دايما غيور على شغله، وحريص على أنه يبقى قد ثقة الناس اللي بتدعمه وواقفة جنبه من البداية، وعمر الثقة بالنفس ما كانت غرور".
وأضاف "جمال": "النجم محمد صلاح لما قال في 2014، أنا هفوز بجايزة أحسن لاعب في إفريقيا وعملها في 2017، كان واثق في نفسه مكانش مغرور، العندليب عبدالحليم حافظ أكتر واحد كان بيعاني في بداياته وقابل صعوبات وإحباطات مالهاش عدد، كان واثق من نفسه وشايف وعارف هو هيوصل لفين، اللي أنا عايز أقوله لكل الشباب والله العظيم وأنا بكلمكوا زي إخواتي دلوقتي، إن كل واحد فيكم هيفضل يسمع انتقادات طول ما هو عايش وفي كل المجالات مش الفن بس، لكن اللي بيكمل هو اللي واثق من نفسه وبيسد ودانه، وبيمشي ورا حلمه مش شايف غيره وساعتها نجاحه هو اللي بيتكلم بالنيابة عنه، كلمة أخيرة قولتها وبقولها وهفضل أقولها لحد آخر نفس، إنتوا صناع النجاح وأنا بكبر بيكو".
