"ادي لجسمك حقه وبص لنص الكباية المليان".. نصائح لكسر الروتين في العمل
"ادي لجسمك حقه وبص لنص الكباية المليان".. نصائح لكسر الروتين في العمل
يواجه البعض شعور بالملل داخل عمله اليومي ويتحول الأمر تحت مسمى الـ"روتين"، وهو الأمر الذي يجعل الشخص يكره عمله وينفر منه.
ويقدم مصطفى خليفة استشاري تطوير الأعمال 10 نصائح لكسر الروتين والتخلص منه.
1. ابدأ يومك صح
"لازم تنام كويس وتدي لجسمك حقه في عدد ساعات النوم والراحة، من الكويس برده أنك تتمشى شويه قبل ماتوصل للشغل لأن ده بيديك نشاط مع بداية اليوم".
2. اعمل تمارين
"من وقت للتاني حاول تقوم ببعض التمارين عشان تغير من وضعية جلوسك ووقفتك حتى لو في الحمام، مهم جدا تدي لجسمك بعض الحركة عشان تزود من نشاطك وتركيزك".
3. انشر السعادة
"من أهم الحاجات اللي بتكسر الروتين أنك تنشر السعادة بين الناس من خلال أنك تقول كلام كويس وتشكر الناس وتشجعهم، وده بينعكس عليك بشعور إيجابي جدا".
4. بص لنص الكباية المليان
"خليك دايما إيجابي وشوف المواقف كلها من وجه نظر فايدتها عليك، ماتبصش على موقف أنه مشكلة، شوفه على أنه فرصة للتحسن وللتعلم، ده بينعكس عليك بطاقة إيجابية كبيرة".
5. دخل لجسمك طاقة
"مهم جدا أنك تاكل وجبة خفيفة في نص اليوم، متكونش حاجه تقيلة عشان تحافظ على تركيزك، ويفضل تكون صحية عشان تساعدك على النشاط وتحس أنك فايق ومركز، مهم كمان ناخد بعض المشروبات، بس تكون متوزعة على مدار اليوم، حلو جدا لو بتحب القهوة أنك تاخد فنجان قهوة الصبح وممكن واحد في نص اليوم، أو تتبدل بشاي، بس مهم متكترش لأنه ممكن يأثر عليك بشكل سلبي".
6. اتعرض للشمس
"حاول في وسط اليوم أنك تاخد راحة وتعرض نفسك للشمس، الشمس والهواء الطلق بيساعدك على زيادة نشاطك وتركيزك وتطرد الكسل".
7. غير مكان شغلك
"من وقت للتاني حاول تغير المكان اللي بتشتغل منه، اقعد على مكتب مختلف أو اشتغل من غرفة تانية، مهم جدا تغير الشكل اللي انت متعود عليه عشان تحس بالتجديد".
8. ابعد عن العدوى
"حاول تبعد عن كل المشاكل والأشخاص دائمي الشكوى والمحبطين وحاول تحاوط نفسك بناس نشيطة لأن النشاط والكسل معديين، احترس دايما انك متدخلش في جو احباط أو مشاكل، خليك بعيد عنها".
9. حافظ على روتين إيجابي
"ممكن يكون قرايه كتاب أو أخبار من وقت للتاني أثناء اليوم، بس زي ماتفقنا ابعد عن الأخبار اللي ممكن تتسبب في احباط، اقرا عن الحاجات اللي بتحبها وبتزود من معلوماتك ومهاراتك".
10. حاول تغير من مهام عملك
"حتى لو مش هتقدر تغير وظيفتك أو مهامك حاول أنك تشارك في مهام أخرى حتى لو بشكل مساعدة، مهم جدا تكسر روتين الشغل نفسه عشان متحسش بالملل".
