عمرو سلامة عن انسحاب حضور فيلم افتتاح "القاهرة":صناع السينما يحتقرونها

12:50 م | الأربعاء 22 نوفمبر 2017

انتقد المخرج عمرو سلامة تصرف حضور حفل افتتاح مهرجان القاهرة السينمائي بالانصراف أثناء عرض فيلم الافتتاح.

وكتب سلامة، عبر صفحته الشخصية على موقع "فيس بوك": "كام مخرج أو سيناريست أو ممثل أو مدير تصوير أو أي فنان سينمائي في مصر بيشوف كل سنة الأفلام اللي كسبت في مهرجان كان أو برلين أو فينيسيا أو حتى بيشوف كل الأفلام اللي اترشحت الأوسكار؟".

وأضاف: "كام منهم بيشوف الأفلام المصرية الثانية المستقلة أو اللي فيها تجربة جديدة أو حتى اللي خدت اهتمام دولي أو عالمي؟ مش هاكون ببالغ لو قولت إن على أكثر تقدير 5% من صناع السينما بس هم اللي عندهم هذا القدر من الاهتمام".

وتابع: "روح بقى أوروبا أو أمريكا أو حتى آسيا، واشتغل في موقع تصوير، هاتلاقي أسطى الإضاءة وأصغر شاب في طاقم الإنتاج شاف كل الأفلام ديه وبيناقشك فيها.. ساعات بنقول إن مشكلة صناعة السينما في مصر هي الورق أو الإمكانيات أو الأجور أو الرقابة.. الحقيقي حتى لو ديه مشاكل حقيقية، فالمشكلة الأكبر إن السينمائيين في مصر مش محبين حقيقيين للسينما، أو حبهم للسينما متلخص في حبهم لما تعطيهم السينما من شهرة وأموال وجمهور".

وأكمل سلامة، في تدوينته: "ده تفسيري للي حصل إمبارح في مهرجان القاهرة، إن أهم مخرج عربي في العالم النهارده، عمل مجهود كبير لتأجيل العرض التجاري في مصر لفيلمه الأمريكي المشارك فيه أهم نجوم في العالم، علشان يفتتح بيه مهرجان القاهرة، وعند بداية عرض الفيلم يهجره الجميع للحاق بحفلة وعشاء، بسبب عدم اهتمامهم أو بسبب تأخير معاد الحفل لسوء التنظيم كما قيل".

وقال: "أنا نفسي عشت التجربة ديه في مصر في مهرجانين مختفلين، وعرفت حجم الحزن والإحباط لما أشوف طاقة الفنانين على السجادة الحمرا وعرض ابتساماتهم، ثم انعدام طاقتهم لمشاهدة الفيلم وخروجهم واحد خلف الآخر حتى يصبح الفيلم معروض لأشباح وبعض اللي اختشوا وقعدوا.. لهذا تفشل مهرجاناتنا، ويهجرها المحبين الحقيقيين للسينما، ولهذا تفشل الصناعة لنجاح في مقدورها الوصول ليه، فعندما يحتقر السينما صناعها، كيف سيحترمها الجمهور؟".