بائع صبار يقدم وصفات للشعر على رصيف المترو

07:15 م | الأحد 29 أكتوبر 2017

على رصيف بالقرب من محطة مترو عين شمس يجلس شاب خمرى اللون فى بداية العشرينات من عمره، على قفص خشبى خلف «ترابيزة» مرصوص عليها عبوات من الزيوت الطبيعية استخرجها لتوه من نبات الصبار. من سوهاج جاء فهد سعد، الحاصل على دبلوم تجارة إلى القاهرة، ليعمل فى عدة مهن كمبيض محارة إلى أن اهتدى إلى بيع زيت الصبار: «جيت القاهرة من 3 سنين، الأول كنت شغال مبيض محارة وشلت زلط وطوب ورمل وبعد كده اتنقلت لبيع زيت الصبار مع تركيبات من الزيوت الطبيعية، وهى عبارة عن زيت زيتون وخروع وجرجير وجوز الهند، والتركيبة بتعالج تساقط الشعر وبتطوله وتتقله وبتشيل القشرة وبتغذى فروة الرأس، ومفيدة للبشرة، لكن من غير تركيبة الزيوت، وممكن يتحط عليها عسل أبيض وزبادى». يبيع «فهد» البرطمان بـ20 جنيهاً، كان فى بداية عمله يحقق مكسباً يتراوح بين 100 و150 جنيهاً، لكن مع ضعف الإقبال على بضاعته، انخفض المكسب إلى 80 أو 70 جنيهاً: «جاتلى الفكرة من النت، لقيتها منتشرة فى إسكندرية والدكاترة بيوصفوها للناس؛ عشان كده بحثت عنه وعرفت فوايده، وقررت أبيعه وأفيد الناس لأنه حاجة طبيعية وجديدة عالناس، خصوصاً فى حى شعبى زى عين شمس»

لا يكتفى «فهد» بالبيع بل يقدم لزبائنه من السيدات وصفات استخدام الصبار: «بشرحلهم طريقة استخدامه بإنهم يغسلوا شعرهم الأول، ويضربوا الصبار فى الخلاط وبعدين يحطوه على شعرهم لمدة 12 ساعة، وبعدين يغسلوه ويسرحوه عادى وتكرر الطريقة دى مرة كل يومين، ومفعولها بيبان فى خلال 10 أو 15 يوم».