هايدي كرم: "معلموناش القراءة في المدارس.. لازم نقرا علشان نحب نفسنا"

02:51 م | الثلاثاء 19 سبتمبر 2017

انتقدت الفنانة هايدي كرم، نظام التعليم في مصر، بأنه يحصر نظر الإنسان في أفق ضيق، ويغلق عليه العالم بأكمله، ولا يهتم بتنمية مهارات الطلاب الشخصية، ولا يسع إلا لكبس المناهج التعليمية في آذان وعقول الطلاب".

وقالت "هايدي" في منشور لها عبر صفحتها الرسمية على موقع الصور والفيديوهات الشهير "انستجرام": "دخلت مدرسة كويسة وجامعة كويسة، واتعلمت على مدار سنين الدراسة الطويلة حساب وكيمياء وفيزياء وأحياء ولغات وتاريخ وجغرافيا، وغيره وغيره من الحشو اللي مالوش نهاية واللي مش فاكرة منه تقريبا ولا حاجة، والحاجة الوحيدة اللي معلمولهناش في المدارس هي القراءة وحب القراءة، لحد ما اتغيرت واتبدلت الأحوال وأصبحت في حال غير الحال، ولقيت الدنيا حوليا غير الدنيا، ولقيتني مش فاهمة حاجة خالص من اللي بيحصل أو ليه بيحصل، وبعد ما كنت فاكراني ناصحة وفاهمة وواعية لقيتني مش فاهمة حاجة خالص، وأتاريني لا أفقه شيء في أي شيء، وأتاري في الدنيا دي حاجات كتير وأفكار كتير ورؤى كتير ومفاهيم كتير، فلسفة كتير أنا معنديش فكره عنها".

وتابعت: "واتاري الدنيا واسعة أوي وأنا من جهلي شايفاها قد خرم الإبرة، لغاية ما اكتشفت الاكتشاف الأعظم في حياتي، اكتشفت القراءة اللي بجد غيرت حياتي ومنظوري لكل وأي حاجة حوليا، علمتني وغيرتني وقوتني وفهمتني وأسعدتني، وماحدش يقولي أنا مش بحب القراءة، أراهنك إنك مجربتش علشان تعرف، أنا كمان كنت فاكرة كده، ولقتني بعشقها، وما حدش يقولي أنا متعودتش عليها من صغري، لأن القراءة عادة ممكن تكتسبها في أي عمر أو مرحلة من حياتك".

وأضافت الفنانة هايدي كرم: "اقرأ في كل حاجة وأي حاجة نفسك تقرأ فيها، القراءة ساحرة، القراءه منقذة، القراءة مفرحة، القراءة هتغير حياتك للأحسن، وعلى فكرة فيه مليون حاجه ممكن نقرأ فيها غير الروايات فالعالم مليان أسرار، ومليان كتب بتتكلم عن الأسرار دي، اقرا علشان تفهم نفسك، اقرأ علشان تفهم اللي حواليك، اقرأ علشان تحب نفسك، اقرأ علشان تحب اللي حوليك وتحب الدنيا، اقرأ لأن المعرفة نور".