كل اتحاد رياضي أو إدارة نادي بيكون ليهم هدف من استقدام مدرب عالمي، الهدف ده يتفق مع أحلام الجمهور أو لا يتفق، ده شيء تاني، المهم إن ليهم هدف، وصلوا له بقى من الطريقة اللي عاجبانا أهلا وسهلا، وصلوا له من طريقة مش عاجبانا برضه بالنسبة لهم أهلا وسهلا، ماوصلولوش يبقى هنا في مشكلة بجد، دي طرق التفكير، ملهاش علاقة بحب وكره هنا.

لما نتكلم عن المنتخب ممكن نتكلم في بعض النقط نفهم بيها أكتر هي المشكلة فين..

1- كوبر مقسم الفرقة لجزر منعزلة

واللي ممكن يربطهم ببعض إنك تخلي الخماسي اللي بيشارك هجوميا يتناقل الكورة بشكل أسرع ويقربوا المساحات بينهم شوية مع فتح الأطراف عن طريق الظهيرين، وده بالمناسبة عكس اللي كوبر بيعمله، إنه بيأخر الظهيرين وعايز الأجنحة تفضل على الطرف واللي ينقلوا الكورة سوا هم السعيد والمهاجم والنني والجناح اللي تروح ناحيته الكورة.. بس!

بالتالي دايما أي فريق باتنين جنيه هيضغط عليك وهيكسب منك الاستحواذ.

2- طارق حامد.. عمرو جمال.. رامي ربيعة

3 لعيبة أثبتت كل التجارب في الدور التاني من الموسم فشلهم الذريع.. أكرر خلال الدور التاني من الموسم، يبقى الطبيعي تغيير حامد بأي لاعب وسط ناجح في الدوري زي (عاشور- هشام محمد- حسين الشحات- فريد شوقي).

تغير عمرو جمال بواحد ليه نفس مواصفات مروان محسن، المهاجم اللي إنت بتحب طريقة لعبه زي (عمرو مرعي- عرفة السيد).

رامي ربيعة المفروض يتبدل بـ سعد سمير.

3- لو غيرت لعيبة أي فرقة بلعيبة تانية بس مغيرتش التعليمات هيفضل الأداء هو هو، ومش هتلاقي أي نتيجة.. بالظبط واحد كان قاعد في البيت بالبوكسر راح قايم خد دش ولبس البدلة وفضل قاعد في البيت برضه وبس ماعملش أي جديد.

يبقى في الأساس المشكلة مش اللعيبة، إنت في فترة برادلي كنت بتلعب بنفس الطريقة وبتشكر ربنا عليها عشان معندكش فعلا حد تختاره للمنتخب أصلا، إنما دلوقتي عندك فرقتين مش فرقة واحدة وتقدر تنفذ بيهم أي افكار إنت عايزها.

كوبر اختار الطريقة الأخطر والأسوأ. اختار إنه يسيب الاستحواذ ويرجع خط دفاعه لداخل الـ 18. - اختار إنه يعزل خط الدفاع والوسط عن الهجوم.

- اختار إنه يلاعب السعيد اللي محدود الرؤية على صالح جمعة صاحب الرؤية الفطرية، واللي كان ممكن يستغلهم سوا في تناقل الكورة بينهم وبين الدفاع والهجوم في تكوين فريق صعب جدا تاخد منه الكورة.

- اختار إنه يلاعب طارق حامد اللي بيتسبب في فاولات خطيرة بصفة مستمرة على فريقه قبل المنتخب.

- اختار إنه يبقى معاه فريق عنده روح ومهارة وخبرة وبرضه محجمه وبيخليه مضغوط نفسيا طول اللقاء.

- اختار إن فرقته تفقد متعتها وهي بتلعب الكورة.

-اختار إنه يبقى بيلعب على الـ 3 بنط لأن محدش في اتحاد الكورة بيحاسبه على سوء الأداء وفقدان الهوية.

كوبر مش غلطان من وجهة نظره هو، بس برضه ماينفعش تطلب من المدافع إنه يبقى هداف الفرقة.

للأسف هيفضل ده كوبر.. وهيفضل معاه الأداء بالشكل ده.

هي دي فلسفته.

• اتحاد الكورة
• حسين الشحات
• خط الدفاع
• خط دفاع
• سعد سمير
• صالح جمعة
• طارق حامد
• عرفة السيد
• على صالح
• عمرو جمال
• كوبر
• منتخب مصر
• حسام عاشور
• اتحاد الكورة
• حسين الشحات
• خط الدفاع
• خط دفاع
• سعد سمير
• صالح جمعة
• طارق حامد
• عرفة السيد
• على صالح
• عمرو جمال
• كوبر
• منتخب مصر
• حسام عاشور