أزمة في "نقل النواب".. رئيس اللجنة للوزير: "هستجوبك"

04:44 م | الاثنين 14 أغسطس 2017

شهد اجتماع لجنة النقل والمواصلات بمجلس النواب، اليوم، المخصص لمناقشة تداعيات حادث تصادم قطارين بالإسكندرية، أزمة حادة بين الدكتور هشام عرفات وزير النقل، والنائب سعد طعيمة رئيس اللجنة، انتهت بتهديد الأخير بتقديم استجواب لمساءلة الوزير.

بدأت الأزمة، خلال إجابة الوزير على تساؤلات النواب، بشأن الطابور الخامس داخل هيئة السكة الحديد، حيث قال الوزير: "مش عارف ليه الشباب مش عايز يشتغل في السكة الحديد، بحاول إقناع مهندسين صغار للعمل بالهيئة من أجل السيطرة على الطابور الخامس".

وقاطعه النائب طعيمة، منفعلا: "استني بقى، بلغتك قبل كده إن في أزمة بسبب المسابقة التي أعلنتم عنها وتم التقدم لها وتم امتحان المتسابقين، ونجح 11 منهم وأخدوا ترتيب، ولكن داخل الهيئة تم رفضهم بعد قبولهم، وأنا قولتلك الكلام ده عشان تحقق فيه"، ورد الوزير: "بنحقق فيه، وشكلت لجنة للتحقيق".

واستطرد النائب طعيمة، قائلا بغضب: "ماينفعش، إزاى بعد ما يتم قبولهم، يتم رفضهم، عايزين نعرف مين الاسماء التي تم وضعها بدل المتسابقين الفائزين، وأنا هبعتهوملك المكتب".

واستكمل كلامه غاضبا: "إذا لم يتم التحقيق في هذه الواقعة، سأتقدم باستجواب، لأنه موضوع خطير، ولو إنت عايز شباب مهندسين، قول وكلهم هيجوا يشتغلوا هو حد لاقى تعيينات دلوقتى".

وعقب الوزير، قائلا: "للأسف مفيش تجديد في القيادات، عايز الفنيين اللي واخدين الدبلومات اللي عايزين نعملها في معهد وردان، دول هنضرب بيهم الطابور الخامس".