سورى يدخر «شقا عمره» فى صندوق: اللى حصل لنا علّمنا نعمل حساب للزنقة

09:41 م | السبت 22 يوليو 2017

«القرش الأبيض ينفع فى اليوم الأسود» منذ 6 سنوات ومن بداية نزوحه من سوريا إلى مصر وهو يحاول أن يواجه غلاء الأسعار والأزمات بـ«التحويش»، صندوق خشبى به فتحة صغيرة يضعه على مائدة الطعام يملأه يومياً بالنقود الفضة وبعض العملات الورقية، فكرة قرر الشاب السورى محمد نور، 27 عاماً، أن ينفذها خوفاً مما يخبئه له الغد: «اللى حصل فى بلدى علّمنى أعمل حساب لبكرة».

ببرطمان زجاجى صغير بدأ «محمد» فى تنفيذ فكرته وادخار كل ما يتبقى معه من النقود، مر يوم تلو الآخر حتى امتلأ البرطمان عن آخره، فذهب إلى نجار مجاور للمكان الذى يسكن به بمحافظة بنها، وطلب منه عمل صندوق خشبى كبير ليضع فيه كل ما يجمعه من المال: «اللى مش هينفعنى دلوقتى هيفيدنى وقت الزنقة.. فكرة التحويش كبرت فى دماغى جداً بقيت أحط الفلوس وأنساها وما أفكرش فيها تانى».

ويتذكر «محمد» طفولته حيث كان يتصرف على العكس تماماً مما يفعله الآن: «زمان ماكنش ممكن يخطر على بالى إنى أحوش فى فلوس، كانت أى فلوس بتكون فى إيدى بصرفها كلها ماكنش بيفضل معايا أى مليم».

وبحسب «محمد» فإن حصيلة ما ادخره من العملة الفضة خلال عام كامل هو 1500 جنيه: «ممكن حد يشوف المبلغ قليل أو يستهين بيه بس فى الزمن ده أى فلوس مهمة جداً وبتفرق وخاصة فى وقت الزنقة والظروف الطارئة»، حيث يرى «محمد» أن مقولة «محدش يضمن الأيام» أكثر جملة معبرة عن حاله.