أصحاب المعاشات يحسبون قيمة العلاوة الجديدة: ما تجبش 2 كيلو لحمة!

10:35 م | الثلاثاء 30 مايو 2017

أحلامهم بسيطة لا تتعدى «أكلة حلوة» كانوا محرومين منها، أو سداد فواتير متأخرة، أو صرف روشتة دواء قديمة كانت مرجأة لحين ميسرة، أو شراء حذاء لستر أقدامهم التى تطل من أحذية بالية، كل هذه الأحلام رغم بساطتها لم يكن فى مقدور أصحاب المعاشات تحقيقها فى ظل ارتفاع الأسعار الذى لا يتناسب مع دخولهم، وبعد أن أعلنت وزارة التضامن الاجتماعى عن علاوة 15% على المعاش بحد أدنى 130 جنيهاً ستصرف فى أول يوليو، استشعر أصحاب المعاشات انفراجة قريبة، لكن أملهم الوحيد أن تنخفض الأسعار.

«إحنا مش عايزين زيادة فى المعاشات، عايزين يبطلوا يرفعوا الأسعار، أنا باخد 1800 جنيه يعنى هزيد نحو 270 جنيه، مايجيبوش شوية طلبات للبيت، كرتونة البيض بـ35 جنيه، وكيلو الفراخ بـ30».

محمد الأطرش

57 سنة

«إحنا بالنسبة للدولة خيل الحكومة اللى عجز، بيرفعوا الأسعار 100%، ويزودوا المعاشات 15%، بنلعب لعبة القط والفار، الـ300 جنيه دول مايجيبوش تمن جزمة النهارده».

ملاك أمين

65 سنة

«فلوس أصحاب المعاشات متوزعة على وزارة المالية والاستثمار فى قروض مش عارفين يرجعوها، فلوس بالمليارات، وكبار السن بقوا بيتسولوا فى الشوارع، كرامتنا متهانة، الزيادة دى هجيب بيها للولاد 2 كيلو سمك بورى».

عبدالرحيم محسن

70 سنة

أنا مريض فيروس سى وعندى مشكلة فى القلب ماقدرش آخد سوفالدى، الزيادة هدفع بيها جزء من فواتير أدوية كبد وقلب تكلفتها الشهرية 800 جنيه.

نبيل شفيق

57 سنة

«أنا قضيت 36 سنة بخدم الدولة، المعاش بيخلص فى أول 10 أيام فى الشهر، والـ300 جنيه اللى هيجولى زيادة هجيب بيهم كيلو جمبرى، مين عارف إن كنا هنعيش لبكرة ولا لأ».

محمد سيد عبدالعزيز

62 سنة

«فى الخارج اللى بيطلع على المعاش، بيتهنَّى ويرتاح ويعوض اللى فات من عمره، عندنا بيشيل الهم، أنا معاشى 1300 جنيه، الزيادة اللى ماتكملش 200 جنيه دى هعزم بيها أحفادى على خروجة، مش هتكفى أشترى لواحد فيهم لبس».

على محمود

60 سنة