نساء شبرا يحذرن من «آن باترسون»: خلّوا بالكم

لا تعلم «هناء» الكثير عن السفيرة الأمريكية لدى مصر، آن باترسون، لكنها تقول عنها إنها ست مش كويسة، لديها مخطط إرهابى ومش بتدخل بلد غير لما تخربها، وتضيف: «إلهى تتخرب بلدها على دماغها، قولوا آمين». تقف «هناء» فى دوران شبرا فى انتظار جاراتها اللائى اتفقن على التجمع فى الدوران، والتحرك مع المسيرة المتجهة نحو قصر الاتحادية لإسقاط الرئيس محمد مرسى وطرده هو والست بتاعته، وتقصد هناء بـ«الست بتاعته» السفيرة الأمريكية اللى بتقعد مع خيرت الشاطر ومحمد بديع وبتحط إيديها فى إيدين الإخوان وتتآمر على المصريين. صور باترسون ارتفعت إلى جوار صور مرسى، وعلى كلمة واحدة هى، ارحل، ويقول سعد المصرى، مسئول حملة «تمرد» فى دوران شبرا: «الست دى من ساعة ما ظهرت وإحنا حاسين إنها بتتحكم فينا»، وأشار إلى أن الحملة طبعت صور السفيرة الأمريكية، وأن أهالى الحى لصقوا الصور على الجدران وفى الشوارع، قائلاً: «لازم الناس تعرف مين آن باترسون وبتعمل إيه فينا»، أكمل «المصرى» حديثه، مشيراً إلى أن الحملة بصدد طبع كتيب حالياَ عن الدور الذى كانت ولا تزال «باترسون» تلعبه فى الشأن المصرى. «الست دى دورها دموى فى التاريخ، لازم ننتبه لها والشعب يعرف إنها مش هدفها الخير ولا أى حاجة كويسة»، يكمل مسعد حديثه، فيما يلتقط طرف الحديث مجدى واصف قائلاً: «الست دى مع الصهيونية، وناسية إن مصر بلد كبيرة مش هايخيل عليها الألاعيب اللى بتتبعها»، فيما قال ميلا حنا غاضباً: «راحت قالت للبابا تواضروس ماتخليش المسيحيين ينزلوا مظاهرات، لكن هو رفض، وقال لها المسيحيون لهم حق فى الوطن، ولهم حرية القرار».