خدمة تسجيل البيانات بـ"تعداد مصر 2017".. رقم قومي "غلط" واسم "مش اسمك"

02:15 م | الاثنين 01 مايو 2017

يحرص على تسجيل بيانات أسرته بمجرد سماعه عن خدمة تسجيل بيانات المواطنين إلكترونياً في تعداد مصر 2017، التي أعلن عنها الجهاز المركزي للتعبئة العامة والإحصاء، خلال مرحلة حصر السكان، كان الرجل الثلاثيني مرحباً، فحاول الدخول إلى موقع التسجيل الرسمي، حتى أتاه طلب كتابة الكود التأكيدي ورقم البطاقة، فوقعت عيناه على الرسالة التي أرسلها الجهاز على هاتفه، حيث فوجئ بأن الرقم القومي لم يكن رقمه، هنا قرر "سعيد" الاتصال برقم الدعم الفني للخدمة، حتى جاءه الرد: "بلغ عن شكوتك، وهنتواصل معاك".

قبل 13 يوماً، لم يبال سعيد محمود، برسالة رقمه القومي التي أرسلها الجهاز له على هاتفه المحمول لعدم صحته، مقرراً الاتصال بخدمة الشكاوى، لمعرفة أسباب الخطأ: "جاتلي مكالمة من شهرين من مندوبين التعداد وخلوني أختار ما بين إن حد يجيلي البيت أو أسجل بياناتي على صفحة الإنترنت، فقررت أسجلها على الصفحة ومن وقتها بعتوا لي الرقم القومي غلط، دخلت رقمي القومي ورفضه الموقع، كتبت اللي بعتوه ليا فتح لي الصفحة ولقيت اسم مش اسمي".

"الاسم الثلاثي لرب الأسرة"، جملة ظهرت بوضوح يتفرع منها 3 خانات، الاسم الأول والثاني والثالث، فالأول هو الوحيد الصحيح لـ"سعيد" حسب قوله: "أنا اسمي سعيد محمود سعيد، والاسم اللي لقيته في صفحة بيانات التعداد سعيد محمد سيد، اتصلت برقم الاستفسار رد عليا واحد قال لي إن مفيش حالياً تعديل بيانات، وإني ممكن أعدل الاسم وأدخل بيانتي على الرقم الغلط عادي، فقلت له ده أكيد مش صح، لو سمحت عايز أعرف إزاي رقمي القومي اتسجل عندكم غلط، فقال لي إنه هيسأل ويرجع لي، وفعلا سأل وقال لي مش هينفع تسجل بيانتك على لارقم ده فعلا، ولما قلت له والعمل إيه قال لي أسجل شكوتي وهيردوا عليا، ولما طلبت أعرف هيردوا إمت قال لي إنه ميعرفش، وأنا مش عارف كده هلحق أسجل بياناتي صح في تعداد السكان ولا مش هلحق، والغلط مش عندي، لأن رقمي السري اتبعت ليا على رقم قومي مش بتاعي، عشان كده مش عارف أسجل بيانات أسرتي لحد دلوقتي وفاضل أيام على التسجيل ويقفل".

"أحمد"، أحد مسؤولي الرد بخدمة عملاء تعداد مصر 2017، قال إن خدمة تسجيل البيانات إلكترونيا جديدة، وكثرة عدد المواطنين الذين يسجلون بياناتهم تتسبب في أعطال الموقع: "واحياناً بيانات المواطنين بيكون فيها اخطاء لكن بالتأكيد بنحلها".