بعد نجاح زيارة بابا الفاتيكان.. مواطنون يطالبون بتكرارها مرة أخرى

01:12 م | الأحد 30 أبريل 2017

ليلة واحدة قضاها البابا فرانسيس الثاني، بابا الفاتيكان، في مصر، تنقل خلالها من منطقة لأخرى دون قلق أو خوف، الأمر الذي دفع الكثيرين للمطالبة لتكرار الزيارة قائلين: "يا ريت يزورنا كتير.. عشان نثبت للإرهاب أن إرهابهم ولا حاجة".

سعيد محمد، شاب عشريني، كان واحد من هؤلاء، جلس أمام شاشة التليفزيون يتابع زيارة البابا فرنسيس الثاني لمصر، معلنا فخره بالتنظيم الذي شهدته الزيارة، قائلا: "اعتبرها رسالة للجميع بأن مصر قوية وفي طريقها الصحيح، وأن حادثتي طنطا والإسكندرية الأخيرتين في مصر ما هي إلا طارئ وعارض".

وتابع محمد: "الأمان يعني مصر، احنا بلد الأمن والأمان والسلام كله، واللي بيحصل من الإرهاب ده حاجة عارضة وملهاش أي قيمة ولا تفرق معانا ولا بعلاقتنا بأخواتنا الأقباط، وزيارة البابا في الوقت ده تحديداً اللي عدت بسلام أكبر رد على كل ارهابي بيفكر يخرب مصر ويخوف أهلها.. احنا مبنخفش".

"ايمان سويلم" حرصت على المتابعة أيضا، ليس لتشاهد مراسم الزيارة فحسب، ولكن لمتابعة ردود فعل "البابا"، قائلة: "كان عجبه ومبهور من شكل الاحتفال بوجوده في مصر، وكان بيتعامل عادي ومبسوط رغم ان الجو كان حر جدا اليومين اللي فاتوا، والناس اللي حضرت كلها في الاستاد كانوا قاعدين في الشمس وكله فرحان ومحدش مضايق".

"منيرة أحمد"، موظفة، قالت: "والله في الأول كنت خايفة جدا يحصل أي حاجة في البلد، حتى لو مش الهدف من بابا الفاتيكان، بس لو كان حصل أي حادث إرهابي كانت هتبقى كارثة، لكن الحمد لله الزيارة عدت بسلام، وكنت مبهورة جدا بالتأمين ومراسم المقابلة التي أثبتت للعالم أننا بلد الأمن والأمان والسلام كله، ومفيش حاجة تكسرنا".