«الزراعة» تعلن طرح «أسماك» بأسعار مخفضة.. ومواطنون: «مفيش حاجة فى المجمعات»

07:30 م | السبت 15 أبريل 2017

نفى عدد من المواطنين علمهم بما أعلنته وزارة الزراعة، أمس، عن ضخ كميات كبيرة من الأسماك بأنواعها المجمدة والمملحة والطازجة، فى المنافذ التابعة لها أو التابعة لوزارة التموين، وبأسعار مخفضة بنسبة 25% عن الأسواق الأخرى، لمواجهة جشع التجار وزيادة الأسعار المبالغ فيها، وفى جولة لـ«الوطن» على المنافذ التابعة لوزارة الزراعة، تبين عدم وجود الأسماك المدعمة التى أعلنت الوزارة عن توافرها.

«ماسمعتش عن القرار ده».. بهذه الكلمات بدأت أمنية ممدوح، فى أوائل العشرينات، بائعة بأحد منافذ وزارة الزراعة بمنطقة الدقى، وتسكن بمنطقة إمبابة، حديثها عن قرار وزارة الزراعة، مؤكدة عدم سماعها بهذا القرار من قبل، وتتابع: «السمك اللى موجود هنا فى المنفذ سمك مجمد زى الفيليه والجمبرى، وده بييجى من شركات مش من وزارة الزراعة، وبيكون أسعاره أقل من الأسواق بس مش كتير»، وتكمل: «السمك الفيليه المجمد بيتباع الكيلو بـ62 جنيه، يعنى مفيش فرق كبير بين هنا وبره»، وتضيف: «عندنا فى المنفذ رنجة بس مش من وزارة الزراعة، وأسعارها أقل من الأسواق بس مش كتير».

{long_qoute_1}

من جانبها، تقول امرأة أربعينية، من سكان منطقة الدقى: «مش عارفة حاجة عن موضوع السمك المدعم ده، ما سمعتش عنه خالص»، وتكمل: «لو وزارة الزراعة نفذت القرار بنفسها، أكيد هنشترى»، موضحة أن السبب أنه سيكون من مصدر موثوق فيه.

ويؤكد هانى مصطفى، موظف، أحد سكان منطقة الدقى، عدم علمه بطرح الأسماك المدعمة التى أعلنتها وزارة الزراعة، ويقول: «ما سمعتش عن الأسماك المدعمة فى التليفزيون ولا قرأته فى الصحف»، ويتابع: «يا ريت الوزارة توفر الأسماك المدعمة فى منافذها، عشان الأسماك دى هتنفع ناس كتير مش عارفين يشتروه من بره».

فيما توضح عاملة بأحد منافذ وزارة الزراعة بالدقى، طلبت عدم ذكر اسمها، أن المنفذ لم يتسلم أسماك البلطى والبورى المعلن عنها بأسعار مخفضة من وزارة الزراعة، مؤكدة توافر نوعين فقط من الأسماك هما المرجان والماكريل، بأسعار تتراوح بين 25 و28 جنيهاً.

ويقول مسئول أحد المجمعات الاستهلاكية بمنطقة الدقى: «مفيش سمك جالنا من وزارة الزراعة لحد دلوقتى»، ويتابع: «سمعت عن القرار من الأسبوع اللى فات بس مفيش حاجة حصلت»، ويضيف: «ما أعرفش إن وزارة الزراعة أعلنت النهارده تانى عن الأسماك المدعمة، إحنا مستنيين أن الأسماك دى تتوفر، عشان هيكون مكسب لينا».

وقال الدكتور خالد الحسنى، رئيس هيئة الثروة السمكية بوزارة الزراعة، إن بروتوكول التعاون مع وزارة التموين يقضى بقيام الشركة المصرية لتسويق الأسماك التابعة لوزارة التموين، بطرح كميات الأسماك المتفق عليها بأسعار مخفضة والحد من سلسة الوسطاء بين المنتج والمستهلك، موضحاً أنه سيتم طرح سمك البورى نمرة 1 بسعر 36 جنيهاً، ونمرة 2 بسعر 33 جنيهاً، كذلك أسماك البلطى نمرة 1 بسعر 16 جنيهاً، ونمرة 2 بسعر 15 جنيهاً، ونمرة 3 بسعر 13 جنيهاً، وبلطى نمرة 4 بسعر 5 جنيهات، ونفى «الحسنى» طرح الأسماك بمنافذ وزارة الزراعة.