ارتفاع الأسعار يهدد تلوين البيض: «كل شم نسيم وانتو مكتئبين»

08:34 م | الخميس 13 أبريل 2017

قبل أيام قليلة من موسم شم النسيم، شهدت حركة بيع البيض انخفاضاً ملحوظاً فى معظم المحال، فارتفاع سعر الكرتونة الذى وصل إلى 35 جنيهاً جعل الإقبال ضعيفاً حتى من قبَل محبى تلوين البيض فى صباح شم النسيم.

موسم هام ينتظره كل عام عادل عياد، صاحب بقالة بمنطقة الدقى، ولكن اختلف الأمر هذا العام فى ظل ارتفاع الأسعار، حيث لاحظ أن إقبال المواطن على شراء البيض انخفض بنسبة كبيرة: «اللى كان بيشترى طبق كامل بقى يشترى 10 بيضات مثلاً أو 5 بيضات قد احتياجات يومين، مفيش بقى تلوين وكده، مين يقدر يشترى كارتونة بـ35 جنيه عشان يلونها».

{long_qoute_1}

أما ناصر عمران، صاحب بقالة بسوق سليمان جوهر بالدقى، فيؤكد أن البيع أصبح بالبيضة، بينما قل زبون الطبق كثيراً: «الزبون يجيب له بيضة بجنيه وربع على قده، معدش حد بياخد بالطبق زى زمان، دلوقتى بقى الناس بتاخد قطاعى سواء فى البيض الأبيض أو الأحمر».

ولأن المنافسة إحدى وسائل البيع المشروعة، حرصت بعض المحال والسلاسل التجارية الكبيرة على جذب الزبون عن طريق عمل عروض تخفيضات، وبحسب أحمد المصرى، يعمل بسوبر ماركت بالدقى، فإن الإدارة قررت جذب الزبون عن طريق بيع الطبق بـ33 جنيهاً بفارق جنيهين عن السوق: «الإقبال على البيض الفترة دى كبير والناس بتشترى حتى لو مش بالطبق بيشتروا بالبيضة، أصل ده موسم بالأخص للأسر اللى عندها أطفال صغيرة لأنهم بيحبوا يلونوا البيض جداً».

ولأن تلوين البيض عادة يحبها الأطفال يوم شم النسيم، حرصت نهى محمد، ربة منزل ولديها طفلان، على إدخال الفرحة على ابنيها وعمل منافسة فى التلوين بينهما، واضطرت إلى الشراء ولكن بكميات قليلة: «إحنا مالناش نفس نفرح بس الأولاد مالهمش ذنب، فاشتريت بكمية أقل عن العادى لأن البيض غالى، كانت البيضة بجنيه مش عارفة زادت العشرين قرش دول ليه؟».

الحال نفسه لدى سارة إبراهيم، التى حرصت على الشراء لإدخال البهجة على المنزل، وخصوصاً وسط الهموم التى تسيطر على المنازل المصرية فى الفترة الأخيرة بسبب ارتفاع الأسعار: «أنا أولادى صغيرين 7 سنين و5 سنين، فكان لازم أعرّفهم بالعادات اللى اتربينا عليها حتى لو الأسعار غالية فاشتريت على قدى».