أولياء أمور فتحوا "حضانة" لأطفالهم: عشان يبقوا تحت عنينا

05:27 م | الأحد 05 مارس 2017

زيادة في مصروفات الحضانة باختلاف المناطق، إهمال غير معتمد أحياناً، وإساءة متعمدة لأطفالهم في أحيان أخرى، أسباب دفعت مجموعة من أولياء الأمور لفتح حضانة أطفال لأبنائهم ببرامج مميزة في الهرم، من أجل تعليم الأطفال وتطوير أفكارهم ومهارتهم بشكل مختلف، وتحت رعايتهم.

داخل الحضانة غرف مخصصة لأنشطة معينة، وبرامج عديدة وضعها أحمد سالم، أحد أولياء الأمور المشتركين في الحضانة، من بينها تخصيص ساعات معينة للأطفال للرسم على الفخار، وتعليم الرماية والخيل على حد قوله: "احنا حوالي اكتر من 12 ولي أمر، اشتركنا مع بعض وفتحنا مشروع حضانة لأولادنا في البداية، عشان يكونوا قدام عينينا واحنا اللي بنعلمهم، وقررنا بدل ما ندفع فلوس كل شهر ومبالغ كبيرة، نفتح بيهم حضانة من غير ما نخاف على عيالنا"، بعد 3 شهور من قرار فتح الحضانة، قرر الرجل الثلاثيني وباقي المشتركين معه في المشروع، فتح الباب واستقبال أطفال غير أبنائهم وانتشار الفكرة: "احنا بنعلمهم كل حاجة، عاملين مزرعة صغيرة فيها ماعز وخرفان وبط ووز وكتاكيت، وبنوفر فطير مشلتت للأطفال كوجبة بالإضافة لوجبة الفطار والغداء، وعملنا اسطبل صغير لتعليم الأطفال ركوب الخيل، وفي اباء مخصصين لتعليم الأطفال الرماية".

500 جنيه، قيمة الاشتراك في الحضانة التي فتحها "أحمد" وباقي أولياء الأمور لتعليم أطفالهم المهارات وتطوير افكارهم بطرق مميزة وجديدة، بدلاً من الحضانات التي تتقاضى مبالغ ليس بالقليل دون فائدة: "الفكرة اننا مش بنستغل الناس، أقل حضانة دلوقتي فلوسها 1500 جنيه، ومبنبقاش عارفين بيعاملوا عيالنا ازاي وبيعلموهم ايه، لأنهم في النهاية مش عيالهم، لكن مشروع فتح الاباء حضانة للأطفال فكرة مميزة، ولو انتشرت مش هنلاقي حد يستغلنا، واللي بيشتغل مننا بنقسم الشغل على بعض"، وتابع: "ايجار مكان الحضانة في الشهر 5 ألاف جنيه، يعني كل واحد فينا بيدفع أقل من اللي كان هيدفعه لعياله، ومكسبنا الوحيد هو اننا نشوف عيالنا قدام عنينا من غير ما حد يهمل فيهم، وكمان يتعلموا صح ويكونوا في مكان أمان".