بالفيديو| "إسراء حسن" رسامة كاريكاتير لـ"الوطن": "مش بعتمد على الفن كدخل"

07:06 م | الجمعة 17 فبراير 2017

في شيء من التركيز، وبخطوط خفيفة الظل، ممسكة بألوان مُبهجة، وممحاة صغيرة، ترسم الفتاة العشرينية إسراء حسن أفكارا وأشكالا لفن الكاريكاتير على الورق، لتقود الكبار والصغار إلى مشكلات المجتمع بقرى المنيا وضواحيها، بتنظيم ورش الكاريكاتير والكرتون.

"لجأت لرسم الكاريكاتير عشان أوجه انتقادات للناس بشيء من السخرية، وبدأت فيه من 3 سنوات، ولقيت نوع من الافتقار للفن كمجال للعمل والكسب منه في المنيا، وبالتالي مش بعتمد عليه كدخل، ومحتاجة دعم فن الكاريكاتير في محافظة المنيا".. بتلك الكلمات وصفت "إسراء" لـ"الوطن" حال موهبتها.

بدأت تخطو باحثة عن رسامين الكارياتير بالمحافظة، في تطلع عن ورش فنية مختلفة: "بدأت أعلّم نفسي، سافرت القاهرة لمرات عشان أشتري مواد خاصة برسم الكاريكاتير، وبدأت أسأل ولقيت ورش الكاريكاتير معظمها في القاهرة وبأسعار فوق مقدرتي، وحضرت ورش رسم خارج المجال، لإني حسيت إنه هيخدمني، حتى نظمت ورش لتعلم الكاريكاتير بالمحافظة، لاقت إقبالا وترحيبا من الأطفال والشباب، وكانت معظمها بالمجان، واشتغلت بيه في جرايد محلية عندنا".

وتستكمل إسراء قائلة: "المجال مهجور جدا عندنا وفرصة مهدورة، وكل الفرص بتوفرها مركزية القاهرة، وأهلي ميرضوش بإني أعيش هناك لأن تقاليدنا مش سامحة، ومتمسكة بأن يكون الكاريكاتير مهنتي رغم تخرجي من كلية التربية التكنولوجية وإلحاح البعض العمل بالتدريس والتفرغ له".

وتقول الفتاة العشرينية: "معظم شغلي عن قضايا المرأة، من الزواج المبكر، وختان الإناث، والتعليم، ده نابع من المجتمع المحيط، والظروف المفروضة على الفتاة بدءا من اتفاق الخطوبة بين العائلتين حتى الزواج، ومجتمعنا مليء بتفاصيل ترهق الفتاة بشكل خاص".

وتضيف: "بحاول بكل طاقتي إني أنشر فكرة الكاريكاتير عندنا، ده سبب قوي خلاني أجمل أحجار الكورنيش بالكارتون واللي هو فن مش بعيد عن الكاريكاتير، وحلمي المنيا تنطق بالمجال، وتقول أنا عندي فنانين ورسامين هطلعهم للنور".