مامضاش غياب.. "خفاجي" يرثي سيد حجاب
مامضاش غياب.. "خفاجي" يرثي سيد حجاب
الصحفي محمد خفاجى يرثى الشاعر الكبير الراحل سيد حجاب، بقصيدة "مامضاش غياب":
مامضاش غياب
كل اللى سايب إبداعات
وسيرة حلوة وذكريات
رغم الفراق رغم الممات
مامضاش غياب
ع الحب قال ” زى الهوا ”
و"كل الجروح ليها دوا ”
وعاشهم الاتنين سوا
ومامضاش غياب
كلماته دى متعشقة
ومتلألئة ومتنسقة
إبداعه فى شعره بقا
ومامضاش غياب
ياشعر عامى دا سيدك
عاش دلعك ولا قيدك
ساهم ف إنه يخلدك
مامضاش غياب
دا كان جرىء وكان جدع
وبشعره دا عمل البدع
كشف الحقيقة ولا خدع
مامضاش غياب
ناضل على مر العصور
وكان شجاع وكان جسور
وبشعره هد ألف سور
مامضاش غياب
نزل الميدان رغم المشيب
قال للفساد آن المغيب
والنصر ياولادى قريب
مامضاش غياب
إرقد ياسيد فى سلام
وليك محبة واحترام
مين ورثه كان حلو الكلام
مامضاش غياب
