بالفيديو| عمرو الليثي لـ "الحكومة: "لمي نفسك"
بالفيديو| عمرو الليثي لـ "الحكومة: "لمي نفسك"
تحدث الإعلامي عمرو الليثي، خلال حلقة برنامجه "واحد من الناس" أمس على شاشة تليفزيون الحياة، عن الخناقات التي نشبت بين الوزراء والمسؤولين خلال الفترة الماضية قائلاً: "الحكومة وقعت في بعض، والخناقات دبت بين الوزراء والمسؤولين، والكل سابوا شغلهم واتفرغوا للخناقات اللي بينهم وبين وبعض، والغريبة أن الدكتور شريف إسماعيل وقف يتفرج علي تبادل الاتهامات والخلافات علي الشاشات والفضائيات والخطير في الموضوع أن كل مسؤول من دولة استغل علاقاته وأدواته للدفاع عن نفسة وبهدلة الطرف الآخر.
وضرب "الليثى" مثل الدكتور أحمد زكي بدر، وزير التنمية الأدارية، الذي دخل في خلاف مع محمد عبد الظاهر محافظ الإسكندرية السابق، مضيفاً: "فجأة لقينا اتهامات بالفساد وخلافات علي أراضي بتتوزع في الجرايد والفضائيات، وشوية ونشبت خلافات تانية بين وزير الأوقاف وشيخ الأزهر علي الخطبة المكتوبة واستخدم كل طرف أدواته، وخرجت حملات تشهير وتشوية".
وتابع: "وأيضاً خناقة محافظ البنك المركزي، مع وزير التخطيط مرة ووزير المالية مرة تانية كوم تانية وأهي بقت كلها خناقات في خناقات، والخطير في الموضوع أن الأمور بتزيد والشائعات بتنتشر وتلاقي اللي بيحول خلاف صغير في غرفة مغلقة إلي خناقة والناس قاعدة مش فاهمة ايه اللي بيحصل وليه دا بيحصل وليه الحكومة ما تطلعش تعلن الحقيقة وتوضح للناس .. وبصراحة بقي طالما انكوا طلعتوا غسلكم اللي مش نظيف للناس يبقي من حقهم يفهموا ايه العبارة بالضبط".
واختتم "الليثى" مقدمة برنامج "واحد من الناس" بجملة "ياحكومة لمي نفسك".
