الدولار يربك سوق الأجهزة الكهربائية: مفيش قدامك غير «المصرى»

10:21 م | الأربعاء 21 سبتمبر 2016

نقص فى الأجهزة الكهربائية المستورَدة، مشكلة تواجهها الأسواق حالياً، فالكثير من المواطنين شكوا من عدم توافر الأجهزة خلال الفترة الأخيرة، خصوصاً بعد أزمة الدولار وأصحاب محال بيع الأجهزة الكهربائية أرجعوا النقص إلى وجود مشكلات فى الاستيراد بسبب الدولار. صفاء إسماعيل، معلمة، نزلت إلى أسواق الأجهزة الكهربائية للبحث عن غسالة، فلم تجد، سألت فى محال أخرى، فقال لها أحد الباعة: «ماتدوريش.. فيه نقص فى السوق»، وهو ما دفعها إلى تغيير النوع: «3 شهور بادور مش بس فى المحلات، رُحت الشركة نفسها، قالوا لى فيه شحنات لسه ماوصلتش، أصل فيه مشكلة فى الاستيراد بسبب الدولار، ولما زهقت جبت نوع تانى».

{long_qoute_1}

لم تكن «صفاء» هى وحدها التى تعانى حسب رأيها، فعدد كبير من معارفها وجيرانها يعانون من المشكلة نفسها، وهو ما تؤكده نجلاء رفعت، موظفة، تسكن منطقة التجمع الخامس: «كنّا رايحين نشترى لبنت أختى جزء من الأجهزة الكهربائية فى جهازها علشان هتتجوز، وفيه حاجات لاقيناها، وحاجات لا، يعنى مثلاً البوتاجازات من ماركات معينة مش موجودة، ونفس الحال للغسالات، ولما سألنا قالوا لنا استنوا شوية».

«هشام»، أحد باعة الأجهزة الكهربائية فى الدقى، برّر المشكلة بنقص الدولار فى الأسواق، بالإضافة إلى اعتماد المصريين على كثير من الأجهزة الكهربائية المستورَدة من الخارج: «منذ منتصف يوليو الماضى وعملية البيع والشراء لم تسر على ما يرام، فهناك نقص فى الكثير من الأجهزة، حتى لو كانت تنتمى إلى الشركة المصنعة نفسها، والسبب أن الكثير من المواد المستخدَمة فى تصنيع تلك الأجهزة إما مستورد من الخارج، أو يتم استيرادها بالكامل».

فتحى سيد، صاحب توكيل إحدى شركات الأجهزة الكهربائية، وقف فى محله بشارع «عبدالعزيز» بالعتبة، ليرد على أسئلة زبائنه عبر هاتفه المحمول بقوله: «لسه ماجاش يا افندم، لسه مش عارفين هتيجى إمتى، فى الطريق والله، بس الدنيا تستقر فى أسعارها»، مؤكداً لـ«الوطن»، أن المشكلة الحقيقية فى عدم ثقة المصريين إلا فى البضاعة المستوردة: «فيه ماركتين بيتصنّعوا فى مصر بشكل كامل ومتوافر فيها كل المنتجات، وبسعر أرخص، لكن الناس بترفض تشتريها، وتقول لك مستنيين اللى جاى»، لافتاً إلى أن سوق الدولار والاستيراد «حالها واقف» منذ 3 أشهر: «الحاجات اللى بتيجى بتكون قطاعى».