حرس الشهيد: سائق النائب العام حاول إخراجه من السيارة بعد الانفجار وكان «متعور فى وشه» ونقلنا ضابط الحراسة للمستشفى فى تاكسى

07:54 م | الخميس 01 سبتمبر 2016

استمعت النيابة العامة خلال التحقيقات لأقوال 2 من حرس النائب العام الشهيد هشام بركات حيث شرح الأول ا/ع تفاصيل الواقعة مجيباً على سؤال المحقق:

س: ما معلوماتك بشأن الواقعة محل التحقيق؟

ج: اللى حصل إن أنا بعمل أمين شرطة بالإدارة العامة للحراسات الخاصة من شهر نوفمبر 2013 تم تكليفى بحراسة المستشار هشام بركات ويوم 29/6/2015 ركاب النائب العام اتحرك من أمام منزله الكائن 7 شارع ابن رشد بمصر الجديدة والركاب اتحرك من أمام المنزل نحو الساعة 9:50 دقيقة صباحاً وكان مكون من دراجة نارية فى أول الركاب وبعد كده سيارة فى المقدمة جيب وبعد كده سيارة النائب العام وهى سيارة نيسان مصفحة وبعد كده سيارة جيب فى المؤخرة والركاب ده اتحرك من شارع ابن رشد وبعد كده دخل شمال فى شارع مصطفى مختار وبعد كده دخل يمين إلى شارع عمار بن ياسر والدراجة النارية اللى فى الأول عدت والسيارة اللى فى المقدمة برده عدت وسيارة النائب العام وهى بتلف يمين حصل انفجار فى سيارة كانت مركونة على اليمين على ناصية الشارع بين مصطفى مختار وعمار بن ياسر والانفجار ده حصل أول ما سيارة النائب كانت بتلف الشارع وأنا فى الوقت ده كنت موجود فى العربية اللى وراء عربية النائب وأول ما حصل الانفجار كان النائب العام لسه موجود فى العربية فالسواق بتاع عربية النائب اللى اسمه عباس والسواق بتاع العربية اللى كنت فيها اسمه عبدالرحيم نزلوا النائب من العربية على الرصيف وفى الوقت ده أنا وزميلى سيد نزلنا الظابط قائد المأمورية المقدم أ/ف من العربية لأنه هو كان موجود فى نفس سيارة النائب العام وفى الوقت ده العربية المصفحة الثانية اللى ركنا عند البيت جت مكان الانفجار وكان فيها زوجة النائب العام وبنته وتم نقل النائب العام فى تلك السيارة إلى مستشفى النزهة الدولى وسيد زميلى نقل المقدم أ/ف فى تاكسى إلى مستشفى هليوبوليس وده كل اللى حصل.

س: ومن هو المسئول تحديداً عن إعطاء التوجيهات لأفراد ذلك الركاب وتحديد خط سيره؟

ج: المسئول عن الكلام ده هو المقدم أ/ف قائد المأمورية.

س: ما هو الموعد المعتاد لتحرك ذلك الركاب يومياً؟

ج: هو الركاب معتاد أن يتحرك فى الأيام العادية من الساعة 7 صباحاً أو الساعة 8 صباحاً حتى وده بيبقى فى الأوقات اللى النائب العام بيروح فيها مكتبه لكن فى أيام الأجازات مش بيبقى فى مواعيد محددة وفى شهر رمضان كان الركاب بيتحرك نحو الساعة 9 صباحاً أو الساعة 10 صباحاً.

س: وما هو خط السير الذى يسلكه هذا الركاب؟

ج: هو كان فى خطين سير بيتم التبادل بينهما، الأول السير فى شارع ابن رشد ثم يسار إلى شارع مصطفى مختار ثم يمين إلى شارع عمار بن ياسر وخط السير الثانى السير فى شارع ابن رشد ثم يمين فى شارع مصطفى مختار ثم يسار فى شارع عمار بن ياسر.

س: وما هو مصدر ذلك الانفجار؟

ج: هو أنا ساعة الانفجار ما حصل وأنا مشفتش حاجة من الدخان اللى حصل لكن بعد كده أنا عرفت إن فى عربية فجروها أثناء مرور موكب النائب العام.

س: وما هو مكان وجودك تحديداً أثناء حدوث ذلك الانفجار؟

ج: أنا كنت موجود فى العربية فى مؤخرة الركاب.

أما الحارس الثانى وهو أمين شرطة بالإدارة العامة لشرطة الحراسات الخاصة «أ/ح» فأجاب على أسئلة المحقق:

س: ما معلوماتك بشأن الواقعة محل التحقيق؟

ج: اللى حصل إن أنا أمين شرطة بإدارة الحراسات الخاصة قسم حرس الوزراء وتم تكليفى فى بداية شهر أكتوبر عام 2013 بأن أكون ضمن طاقم حراسة المستشار هشام بركات النائب العام وكانت الحراسة دى قاصرة على الركاب الخارجى فى أوقات العمل الرسمية والخاصة حسب تعليمات سيادته وهو كان متعود يروح الشغل يومياً ما عدا يوم الجمعة والسبت أحياناً، وكان الموكب بيتحرك من أمام منزله فى تمام الساعة الثامنة صباحاً وأحياناً الساعة التاسعة صباحاً وفى رمضان بيكون التحرك الساعة العاشرة صباحاً وإحنا بنبقى موجودين قبلها بساعة للتجهيز وبتاريخ 29/6/2015 جهزنا الركب زى كل يوم وسعادة النائب الله يرحمه نزل من البيت الساعة عشرة إلا عشرة صباحاً وركب الموكب اللى مكون من ثلاث سيارات اثنين جيب وواحدة مصفحة خاصة بسيادته وطاقم الحراسة كون من ضابط وثلاثة أفراد والضابط بيكون راكب فى سيارة المستشار النائب العام والأفراد متوزعين على العربيتين التانيين بالإضافة إلى دراجة نارية بتكون أمام الموكب ويومها أنا كنت موجود فى العربية الخلفية وعربية النائب العام بتكون فى الوسط وأمامها العربية الثانية وإحنا ماشيين بعد التحرك بثلاث دقائق عند ناصية الشارع المؤدى إلى الكلية الحربية حصل انفجار أنا ماتبينتش مصدره وتسبب فى دخان كثيف منعنا من الرؤية للحظات وبعدها لقيت العربية اللى أنا كنت فيها مخبوطة فى عربية النائب العام من ورا ولقيت ضابط الحراسة المقدم أ/ف مد إيده من العربية بتاعت النائب العام وبتنزف دم ولما جريت عليه علشان أشيله لقيت سواق عربية النائب العام واسمه عباس مطلع معالى النائب بره العربية وكان متعور فى وشه.

س: هل تبينت ثمة تلفيات أخرى بموقع الحادث؟

ج: أنا شفت عربيات أخرى كانت واقفة فى المكان مولعة.

س: هل تتهم ثمة أحد باتهام الواقعة؟

ج: أنا بتهم أى حد توصل له التحريات.

س: هل لديك أقوال أخرى؟

ج: لأ.