أهالى "فيشا" بالبحيرة لـ"وزير الكهرباء": "مش هندفع الفواتير وشيل العدادات وخليها ضلمة"

01:20 م | الأحد 21 أغسطس 2016

أعلن أهالي قرية "فيشا"، مركز المحمودية بمحافظة البحيرة، امتناعهم عن دفع فواتير الكهرباء، بسبب الزيادة التي أعتبروها مبالغ فيها على الفواتير، والتى أقرها مؤخرا وزير الكهرباء الدكتور محمد شاكر، قائلين: "مش هندفع لأننا بصراحة مش قادرين ندفع، وتعالوا شيلوا العدادات وأقطعوا التيار عن منازل القرية، وخلوها ضلمة".

وقال جمال خطاب، رئيس لجنة الدفاع عن الحريات بنقابة المحامين، وأحد أهالى القرية، إن فواتير الكهرباء زادت بشكل مبالغ فيه للغاية خلال الفترة الأخيرة، فى ظل السياسة التي تتبعها الحكومة بالاستمرار فى فرض إتاوات على المواطنين، لتعويض فشلها فى إدارة البلاد خاصة من الناحية الاقتصادية.

وحذر خطاب، من ثورة جياع قادمة جراء سياسة "الجباية" التى تتبعها حكومة المهندس شريف إسماعيل مع الشعب المصرى، خاصة البسطاء والغلابة والفقراء، الذين باتوا يئنون كثيرا من ضغوط الحياة اليومية، وارتفاع الأسعار فى كل شيء، دون أى تدخل من الحكومة.

وبنبرة غضب وحزن، قالت نوال حسن، ربة منزل: "فواتير الكهرباء زادت قوى علينا، ومش قادرين ندفع، لأننا ناس غلابة وعلى قد حالنا، ومش لاقيين ناكل، ويدوب عايشين يوم بيوم، لازم الجكومة تبص لنا شوية عشان خاطر ربنا، ارحمونا وراعوا ظروفنا شوية".

أما أحمد حسين رمضان، موظف، فقال: "راتبى لا يتجاوز 500 جنيه، ولدى أولاد بالتعليم، وأعمل إيه واعيش إزاى وآكل منين بالمبلغ ده، وكمان أدفع فواتير كهربا ومياه إزاى، يا ناس ارحمونا عشان ربنا يرحمكوا".

فرحات السماحى، بالمعاش، قال: "أتقاضى معاش بسيط، لا يكفى مطالب الحياة اليومية، فكيف أدفع فواتير كهرباء ومياه، فى ظل الزيادة الكبيرة التى تم فرضها على الفواتير، كده احنا مش هندفع الفواتير، وخلى وزير الكهرباء يشيل العدادات ويقطع التيار عننا، ونعيش فى الضلمة، إذا كان ده هيريح الحكومة".