نشوى مصطفى: "اللي بيندبوا عشان الدولار.. زمان كنا بنقف طابور عشان فرخة"
نشوى مصطفى: "اللي بيندبوا عشان الدولار.. زمان كنا بنقف طابور عشان فرخة"
هاجمت الفنانة نشوى مصطفى، منتقدي ارتفاع سعر الدولار في الفترة الأخيرة، مؤكدة أن جيلها كان يقف طابورًا طويلًا من أجل الحصل على "دجاجة".
وقالت نشوى على حسابها على "فيس بوك": "بمناسبة الناس اللي بيندبوا علشان سعر صرف الدولار وعلشان اقتصادنا اللي في النازل وعلشان الناس اللي مش لاقية تاكل، طيب خدوا مني الكلمتين دول، زمان كنا بنقف طابور في الجمعية علشان ناخد فرخة على بطاقة التموين، لكل أسرة فرخة واحدة، وكنا بنشوف واسطة أو ندفع رشوة علشان نجيب اتنين كيلو لحمة جمعية".
وتابعت نشوى: "زمان كان أبويا بيعمل جمعية في الشغل مع صحابه علشان يقبضها أول السنة الدراسية علشان مايقدرش يدفع مصاريفنا من مرتبه، زمان كنت باقدم شهادة فقر علشان آخد كتب الجامعة ببلاش لأن مرتب أبويا مابيكفيش، زمان ماكنتش أقدر أشترى هدوم من وسط البلد فكانت أمي بتفصل لنا علشان مافيش فلوس، كان اقتصادنا طين.. ليه؟ كنا طالعين من حالة حرب دلوقتي بقى إحنا بنحارب.. بنحارب بجد، اللي ليه قريب مجند في سيناء يسأله لو مش عارف، واللي ليه قريب في السياحة يسأله ليه مافيش سياحة لو مش عارف، واللي ليه قريب كان بيشتغل في مصنع من مصانع العاشر أو 6 أكتوبر يسأله ليه قفلوا المصنع لو مش عارف، واللي عنده نظر يشوف اللي بيحصل حوالينا في بلاد عربية شقيقه ويركز في مصيرهم".
وواصلت: "وأخيرا أنا عارفة إننا في كارثة وبعاني منها زي كل أهل مصر، بس بمنتهى الرجولة هستحمل وحاقدر لو الظروف حكمت أصوم طول السنة علشان آكل طقة واحدة في اليوم، وحاقدر أستحمل إن بنتي تتأخر ترم أو حتى سنة دراسية لو ماعنديش مصاريفها، أنا ست مصرية بجد، أنا في حمى جيش مصر، أنا مصدقة في الرئيس اللي انتخبته بكل إرادتي، اللي شايف إنى تقيلة على قلبه وإن قناعاتي ضد قناعاته وإن حبي لبلدي حيضايقه يطلع بره وياخد الباب في إيده، وتحيا مصر رغما عنهم إن شاء الله".
