بالفيديو| طلاب ثانوي خلال وقفة احتجاجية: "الامتحانات بتتباع زي الحشيش"

04:44 م | الاثنين 27 يونيو 2016

ينظم طلاب الثانوية العامة، وقفة احتجاجية أمام مبنى وزارة التربية والتعليم، اليوم، احتجاجا على قرار إلغاء امتحانات الثانوية العامة بعد تسريبها.

وقال الطالب ناصر عماد، طالب في الصف الثالث الثانوي "علمي علوم": "بالنسبة للوقفة جت بسبب إننا عرفنا أنه تم إلغاء امتحان الديناميكا، وأنهم عاوزين يأجلوا الامتحانات كلها لمدة أسبوع.. انت مش عارف تحافظ على ورقة امتحان ليه بنمتحن أصلا!!".

وتابع: "كل الامتحانات بتتسرب، وهو أجّل الامتحانات لمدة أسبوع.. وهتتسرب لولاد الباشا وولاد الناس اللي معاها فلوس.. الامتحان في شبرا الخيمة بيتباع زي الحشيش في شارع هناك بتخش تتفتش ويطلعوا بطاقتك يعرفوا أنت مين وبعدين تدفع 700 جنيه وتاخد الامتحان وفيه ناس بتصوره".

وأضاف عماد: "امتحان الديناميكا معايا من الساعة 5 ونص منزله عندي من فيس بوك، وناس صحابي قالوا بعد الامتحان إنه اتلغى.. طب إزاي والناس اللي مذاكرة من أول السنة دي.. وفي الآخر لما أنت تلغي هيسقطوا".

وأضاف طالب آخر: "أن كل المشاركين في الوقفة الاحتجاجية من أقسام الأدبي والعلمي بسبب إلغاء امتحان الجيولوجيا.. ده خلل من عندك أنت إحنا ذنبنا إيه".

ومن جانبه، قال الطالب أحمد سيد، في الصف الثالث الثانوي "علمي رياضة": "امبارح وأنا داخل امتحان الديناميكا العيال داخلين معاهم الامتحان.. وأنا معيش حاجة.. باسمعهم أول ما دخلنا إيه ده هو ده الامتحان.. وبعد ساعة إلا ربع واحد من صحابي مبيفتحش كتاب خلص وخرج وأنا لسه، طيب حرقة الدم ليه!!، وأنا واحد ذاكرت وواحد مفتحش المادة راح قفل الامتحان".

وأوضحت طالبة أخرى: "احنا نجيب نفسية منين نذاكر بيها تاني، وأذاكر الديناميكا اللي أنا مخلصاها ورميت ورقها هجيب أنا منين تاني، طول السنة دروس وطول السنة مصاريف.. أنا علمي رياضة وأبويا دفع أكثر من 12 ألف جنيه في السنة اللي هو أصلا مش المفروض إننا ندفع".

وتابعت: "أنا مصدقت إني خلاص هخلص ومش عايزة تعليم تاني أصلا وبعد ده كله جاي تقولنا معلش هنأجل.. تأجيل إيه.. بقى ورقة امتحان مش عارف تحميها أمال إزاي بتحمي البلد، أنا كل يوم بنزل الصبح بشوف بنات معاهم ورق وقاعدين ماسكين النت.. يعني اللي معاه باقة يجيب مجموع.. وأنا اللي مفحوتة طول السنة مجبش أي حاجة!!".