"أبوصوير" تستغيث من انقطاع المياه.. والأهالي للمسئولين: "بلاش ندعي عليكم واحنا صايمين"

02:00 م | الاثنين 06 يونيو 2016

استغاث أهالي مدينة أبو صوير البلد، بمحافظة الإسماعيلية، من استمرار حالة انقطاع المياه لديهم، مطالبين اللواء ياسين طاهر محافظ الإسماعيلية بسرعة التدخل لحل مشاكل انقطاع المياه المستمر خاصة مع دخول شهر رمضان المبارك.

وقال محمد محمد علي، من الأهالي المتضررين، "يعني نقول إيه دلوقتي، يدخل علينا الشهر الكريم، ومافيش ولا نقطة مياه في القرية والعزب، يعني نفطر إزاي وعلى ايه المسئولين بينشفوا ريقنا في الفطار والصوم كمان".

بدورها، قالت نجية عبد الهادي ربة منزل، "والله أنا ماسكة نفسي عن الدعاء على المسؤولين لغاية دلوقتي، بلاش ندعي عليكم في الأيام الطاهرة دي، لازم يتحركوا ويحلوا مشاكل المياه كده مش هينفع".

وطالب محمد عيسى، أحد المتضررين من الأزمة، الأهالي بمقاضاة شركة المياه التي تسببت في عطش الأهالي والأرض، مؤكدا أن الأراضي جفت من قلة المياه.

وتابع بسيوني متولي: "إحنا هنعيش في الهم ده كده على طول ولا إيه، لا استغاثات نافعة ولا تجمهر شافع، ولا صوتنا بيوصل طيب نعمل ايه علشان المسئول يستجيب للمأساة دي".