أديب يتغزل في "الهضبة": "عمرو دياب بتطلع له عضلات في وشه"

02:17 م | الأربعاء 11 مايو 2016

قال الإعلامي عمرو أديب، إن الفنان عمرو دياب، كل يوم "بيصغر في الشكل"، رغم كبر سنه، مضيفا "ده بيطلعله شعر، وأنا شعري بيقع وكل يوم بيصغر، مش عايز أنق عليه، بس ده بيعمل أي شريط ويحط فيه أي مزيكا بيخلص كله".

وأضاف أديب، خلال برنامجه "القاهرة اليوم"، على شاشة "اليوم"، "الراجل بيطلعله عضلات في وشه، ومهما نقيت عليه مابيأثرش، فردت الإعلامية رانيا بدوي، قائلة: "بطل نق عليه وقول بسم الله ماشاء الله الله اكبر".

وتابع أديب متسائلا: "بذمتك حد فينا عنده وجه طبيعي حلو كده؟ ده عنيه من قورته زي المسافة من مناخيره لشفايفه، طيب دي رقبة حد داخل على الستين، وكأنه شاب في الثانوية العامة، فعقبت رانيا: "عشان بيلعب رياضة"، فرد أديب: "طيب ما أنا بلعب زفت مابقتش زيه ليه".

واستطرد "ده بيغيظني، وكأنه بيغني عمرنا ما هنرجع زي زمان عشاني، ده بيموتني يا جدعان، مفيش حباية في وشه؟ ده أنا وشي مليان حبوب، شايفة التجاعيد اللي في وشي؟ ده مفيش في وشه تجعيدة، وكل ده طبيعي مش عمليات تجميل، إشمعنى أنا، ده كل حاجة فيه اتحسنت، ده حتى ودانه اتحسنت"، فعلّقت رانيا: "حد يا جماعة يتصل بعمرو دياب يطمن على صحته"، فعقب: "ده حديد يا بنتي مش بيجراله حاجة".