قصه إيزيس من أسوان.. وتحول "شمو العيد" لـ"شم النسيم"
اللي زار أسوان والنوبة هيبقى عارف يعني إيه لما أقول إنها أجمل بلد في العالم بطبيعتها البكر ونيلنا الخلاب، في وسط نهر النيل بجزيرة أجيليكا في معبد اسمه معبد "فيلة" (اللي تم نقله وتجميعه من جزيرة فيلة لإنقاذه من الغرق بعد بناء السد العالي، وتم بمساعدة دول العالم تفكيك المعبد وإعاده تركيبه، وكانوا بيرقموا الأحجار عشان دقة إعاده البناء).
كان بيتم عبادة أوزوريس في المعبد ده، ويرجع اسم "فيلة" أو "فيلاي" إلى اللغة اليونانية التي تعني "الحبيبة" أو "الحبيبات".
- أوزوريس ليه أسطورة جميلة جدًا، وممكن تروح تسمعها في عرض الصوت والضوء في المعبد بتذكرة بـ20 جنيهًا للعرض باللغة العربية و100 جنيه للغات الأجنبية "لمعرفة المواعيد والأسعار من هنا (http://www.giza.gov.eg/Tourism1/SoundAndLight.aspx).
ملخص أسطورة أوزوريس بتقول إن أخوه ست كان حاقد عليه عشان كان مكروهًا وأخوه كان محبوبًا فقرر التخلص منه، فعمل وليمة دعا فيها كل الناس وجاب تابوت مزين بالأحجار الكريمة وجعله هدية للي هيكون مناسب لجسمه، وطبعًا كان عمله على مقاس جسد أوزوريس، وقفل عليه التابوت ورماه في النيل، وزوجته أيزيس دورت على جسد زوجها، ودعت إن الروح تترد فيه، وده اللي حصل بس ست مسكتش وقطع أخوه ومزق جثته ووزعها في أقاليم مصر المختلفة، استطاعت إيزيس تجميعها إلا قطعة واحدة أكلتها سمكة.
طيب منين ظهر عيد "شم النسيم"؟
ربط المصريون القدماء فصل الحصاد "زي الربيع عندنا" واللي كانوا بيسموه "شمو" بقصة أوزوريس، وكانوا يعتقدون أن هذا الموسم الذي تبعث فيه الحياة في جسد أوزوريس، وإن علامة البعث ده "الثمار تنضج في هذا الوقت"، وده بيبتدي يوم 21 مارس، ويقال أن سيم معناها أعواد القمح والنبات وشم النسيم معناها "نضج النباتات".
كمان يقال إن عمل السمك المملح - اللي هو الفسيخ - زي عملية تحنيط الموتى وربطه بينه وبين جسد أوزوريس، كمان إن السمك هو اللي أكل القطعة الأخيره من جسده، ففي روايات بتقول إنه كان محرم أكل السمك حتى بداية شمو فكانوا يقومون بتخزينه عن طريق تفسيخه بالملح – فأكل السمك المملح كان نوعًا من التوحد مع أوزوريس.
سبب تغيير تاريخ العيد، في العهد القبطي ومع انتشار الديانة المسيحية كان من الصعب الاحتفال بالعيد خلال فتره الصوم عشان مينفعش ياكلوا أكلات شم النسيم، فتأجل الاحتفال لما بعد الصوم.
- مين كان يفكر إن "شم النسيم" أصله فرعوني؟
طبعًا وأنت في أسوان زور النوبة، وممكن تقعد في بيوت نوبية في منها بيأجر مكان للإقامه الفرد بيبتدي من 100 جنيه فأكثر حسب عدد الأفراد، كمان بيعملوا أحلى فطار نوبي وغداء وعشاء وهناك أصناف كثيرة، ووجبة الإفطار بتكون في حدود 40 جنيهًا والغداء والعشاء في حدود 80 جنيهًا "بيبقى فيها أكتر من نوع لحوم وخضار وعيش ورز وشوربه".
برده الانتقالات بالمركب لأي مكان على حسب العدد، وممكن يكلف المشوار رايح جاي الفرد 20 جنيهًا فيما فوق، طبعًا الأسعار بتختلف على حسب الموسم وكمان العدد والمكان وبعده.
لو هتروح بالقطار فتذكرته من القاهرة لأسوان 300 جنيه للفرد في كابينه نوم مزدوجة، و600 لو رايح جاي، وبيتحرك من الـ8 مساء ويوصل صباح اليوم التالي، ولو هتروح طيران احجز من بدري وخلي بالك ممكن السعر يفرق جامد في نفس اليوم بس أوقات مختلفة أو يوم عن اللي بعده فقارن الأسعار كويس قبل الحجز، وأخيرًا اللي مسافرش أسوان ميعرفش مصر.
- أتمنى ليكم رحلة سريعة جميلة موفرة ترضي جميع الأذواق، ولمعلومات أكتر عن رحلاتي وسفري زوروا صفحتي
