- وبمناسبة «الخرابات» بأه.. كان فيه سيرك أول إمبارح نصبه عمرو أديب، وأول ما طلع على الهواء وجه كلامه لرئيس نادى الزمالك مرتضى منصور.. وقال له: «آدى الحلقة طلعت أهه.. وميدو جاى أهه ولا كسرت الاستوديو».. وطبعاً كان مرتضى هدد عمرو من أسبوع: «الحلقة مش طالعة وأنا هاكسّر الاستوديو عليك».. وميدو قال: «يا مرتضى أنت ماسافرتش أوروبا.. لا توجد خرابات فى أوروبا.. ربما أنت اعتدت على هذا الأمر.. لكن فى أوروبا لا توجد خرابات».. ورد عليه عمرو أديب ضاحكاً: «مرتضى خبير خرابات».. طب وميدو سكت؟!

- أبداً.. جاب القديم والجديد.. وقال لو هموت «مكمّل».. ويا ريّس - مخاطباً الرئيس - ده مرتضى قال عليك ماتخلنيش أقلب عليك وإزاى تسكت له.. وهُب راح داخل على حتة «بتوجع» مرتضى أوى أوى.. وقال: «أنا وقفت معاك لما وايت نايتس تبولوا عليك.. لما رموا كيس على قفا مرتضى من سنة ونص».. والقصة دى تحديداً.. قصة «البول».. مرتضى مسميها: «رموا عليّا مية نار».. وراجع جميع فيديوهاته.. وده يؤكد لك أن مرتضى «طيّب» ومابيعرفش يفرق بين «البول ومية النار».. طب ومرتضى سكت!؟

- مرتضى حقيقى عمل حركة «حلوة شويتين».. أول إمبارح الضهر فكّر يغلوش على حوار ميدو.. ويطلع «فريق كورة» مع وائل الإبراشى.. وهُب «شحن» المدير الفنى الجديد للزمالك «ماكليش» وإسماعيل يوسف وأحمد مرتضى وعلى محمدين والسيد عكشة وعلى السيد والسيد على ومحمد أحمد وأحمد محمد وباسم مرسى ومحمد زيدان.. والحقيقة أن كل الفريق ده «ماكلش» خالص.. وحلقة ميدو مع عمرو «اللى مقطّع البطاقة» زعلته أوى.. أوى.. أوى.

- والغريب إيه.. إن أحمد مرتضى قال: «ماكليش» هيجيب الدورى والكاس وكاس أفريقيا وهنروح كاس العالم.. ولو فيه بطولة كونية هنجيبها.. والأغرب إيه.. إن محمود طاهر رئيس الأهلى قال لـمارتن يول المدرب الجديد.. هتجيب لنا الدورى والكاس وكدهوّن.. وبصوت توفيق الدقن.. لو ده هيجيب الدورى والكاس وده هيجيب الدورى والكاس.. «أومااااااااااال مين اللى هيتغلب»؟.

- وكان أول حاجة عرفتها إمبارح الصبح أن ممثلة اسمها ميرهان حسين اتخطفت واتحجزت فى قسم الهرم.. وده نشره النجم خالد الصاوى.. والحقيقة أنى شفت الفيديو بتاعها هى والضباط.. والحقيقة أن «ميرهان» قالت ألفاظ «سيئة جداً».. يعنى ماتتكتبش أبداً.. أبداً.. ألفاظ بتتقال فى «الخرابات».. وبس.

- وعشان «مانظلمش» البنت هنقول أن فيه «حدث» قبل الفيديو.. ربما «رخامة» ربما «تهزيق».. وده اللى طلّعها عن شعورها.. وفى الفيديو قبل الشتيمة قالت: «تضربنى أنا يا... يا...» بمعنى أن حد ضربها.. وحدث ما حدث.. وفيه اتهام ليها بأنها ضربت ضابط بالقلم ومعاها 2 زجاجة خمر.. وعموماً.. ننتظر قرارات النيابة.

- طب نروح إسكندرية.. خبر إن محافظ إسكندرية عزم وزير الثقافة بـ 40 ألف جنيه.. جمبرى وسمك وبورى وبلطجى «مشوى ومقلى» وسلطات وبابا غنوج.. والحقيقة أن دى جريمة.. ولو حقيقى كان لازم المحافظ يمشى.. أى والله.. بس ده صح ولّا غلط.. أقول لك أنا.

- اللى كانوا فى الغداء.. المحافظ والوزير و78 فرد تانيين.. من الطاقم.. يعنى 80 واحد.. والمطعم «فِش ماركت» مع «الغداء الجماعى» بيعمل تخفيض.. وعليه العزومة تكلفت نحو 10 آلاف جنيه مش أكتر.. واللى حاسب اتحاد الناشرين وليس المحافظة!! وده كلام من زملاء فى الإسكندرية أثق فيهم.. والمحافظ مش راضى يرد وقال: «الموضوع مايستاهلش»!!!

- وعشان فيها حاجة حلوة.. وفيها أمل.. وفيه رغبة.. الشاب أحمد رجع لأسرته بعد 24 عاماً من «التيه».. الولد من أسيوط وتاه وعمره 3 سنين واتلقى فى المطرية بالقاهرة.. واحتفظ بصوره.. وكبر وكبر وبقى مهندس.. وفضل يدوّر على أسرته.. وكتب من شهرين رسالة لأمه «اللى مايعرفهاش فى فيس بوك.. وقال لها أنا أحمد يا أمى وفيها علامات فى إيدى وفى صدرى.. وأحمد رجع.. إيه ده.. إيه الدراما دى.. دراما أوقع بكثير من السينما # أنت وبس اللى حبيبى وفيه لينك آهو من «الوطن» حاكى القصة كاملة:

www.elwatannews.com/news/details/999790

• إسماعيل يوسف
• اتحاد الناشرين
• الزمالك مرتضى منصور
• المدرب الجديد
• المدير الفنى الجديد
• باسم مرسى
• توفيق الدقن
• أحمد مرتضى
• أديب
• أسبوع
• إسماعيل يوسف
• اتحاد الناشرين
• الزمالك مرتضى منصور
• المدرب الجديد
• المدير الفنى الجديد
• باسم مرسى
• توفيق الدقن
• أحمد مرتضى
• أديب
• أسبوع
• إسماعيل يوسف
• اتحاد الناشرين
• الزمالك مرتضى منصور
• المدرب الجديد
• المدير الفنى الجديد
• باسم مرسى
• توفيق الدقن
• أحمد مرتضى
• أديب
• أسبوع
• إسماعيل يوسف
• اتحاد الناشرين
• الزمالك مرتضى منصور
• المدرب الجديد
• المدير الفنى الجديد
• باسم مرسى
• توفيق الدقن
• أحمد مرتضى
• أديب
• أسبوع