عصام صاصا يتجاوز الحادث الأخير.. ويروج لحفل دبي
عصام صاصا
روج مطرب المهرجانات عصام صاصا لحفله المقبل، المقرر أن يقام السبت المٌقبل، على مسرح the show dubai، بدولة الإمارات العربية المُتحدة.
ونشر صاصا ستوري عبر صفحته على «إنستجرام» لبرومو الحفل، وعلق عليها: «يوم السبت اللي جاي في the show».
وتعرض عصام صاصا مؤخرًا لحادث سير كبير، لكنه قرر مؤخرا أن يعود مرة أخرى للعمل، وكتب عبر «فيسبوك»: «بسم الله الرحمن الرحيم.. ربنا وحده يعلم أنا بكتب الكلام دا، وأنا عامل ازاي وفيا أيه.. أنا بقالي أكتر من شهر قاعد من غير شغل، ومعنديش أي حاجة أعملها، غير إني قاعد، وما باليد حيلة، مستني قضاء ربنا سبحانه وتعالى، ومحدش هيفهم أو هيحس بالموضوع غيري».
وأضاف: «أنا مطلعتش اتكلمت وعدت وزدت في الموضوع كتير، ومحدش شافني حتى بفيديو قلت أي كلمة خالص، لكن عندي شغلي وعندي عقود والتزامات، لما أعملها وأخلصها يا إما هدخل في قصة تانية.. أنا مش قدها، وشرط جزائي».
وتابع: «أنا هنزل شغلي وهشتغل، لأني مش بإيدي أي حاجة غير إني أعمل كده، أنا عندي أمي وأخويا وعندي مراتي وابني، وفرقة فيها أكتر من 35 شخص في رقبتي أنا شاب لسه ببدأ حياتي، ولسه بقول يا رب.. مصاريف البيت والأقساط والحاجات دي كلها اللي أنتم متعرفوش عنها حاجة، مين اللي هيدفعها، أنا طالع أتكلم لأن ما باليد حيلة غير أنكم لازم تفهموا إن كل اللي بتسمعوا مش صح، الفلوس والقصور والعربيات، كل ده مش صح، وحال الناس اللي شغالين معايا، كل دول حالهم، واقف بسببي أنا كل دول ليهم بيوت وعيال ودنيا تانية خالص».