أطفال شوارع يقدمون «كورال تحيا مصر»
على مسرح خشبى، وقف «عمر» وأصدقاؤه بين أطفال منطقة قلعة الكبش، يختارون من بينهم الأصوات المميزة، فقد قرروا إنشاء كورال طفولى يحمل فكرة جديدة، كورال يضم خليطاً من أطفال شوارع ونزلاء ملاجئ أيتام، لخلق طفل لديه الولاء والانتماء لوطنه، بعيداً عن استغلاله سياسياً.
حالة من الفرحة تكاد تقفز من الوجوه، بدأ الشاب العشرينى وفريقه بتنظيم الأطفال فى صف واحد، «هدفنا نخليهم يعرفوا يحافظوا على بلدهم ويحبوها، فى الأول جمعنا الأصوات الحلوة منهم، عشان نعمل كورال يشارك فى كل احتفال قومى، واللى صوته مش حلو بنعلمه نشاط تانى يفيد البلد»، قالها الشاب عمر.
الفريق واجه بعض الصعوبات فى تكوين كورال الأطفال «رحنا أكتر من 10 مناطق غير قلعة الكبش، عشان نحاول نركز على أطفال الشوارع اللى فعلاً محتاجين نساعدهم وينفع نضمهم فى الكورال، لحد ما قدرنا نوصل لـ35 طفلاً صوته حلو من أعمار مختلفة، والباقى بنحاول نساعدهم».
3 أشهر استغرقها «عمر» ورفاقه فى البحث عن أطفال الشوارع وملاجئ الأيتام المناسبين لفكرته «أول حفلة الأطفال غنوا فيها فى انتصار 6 أكتوبر هذه السنة، وفرنا لهم مسرح فى الشارع لحد ما نلاقى أماكن مناسبة يغنوا فيها»، مضيفاً «حلمنا نوصل بيهم يغنوا فى الأوبرا ومسارح عالمية، لأن أصواتهم حلوة جداً».
عدة أسماء عرضها «عمر» وفريقه على الأطفال لتسمية الكورال، لكن وكما يقول عمر «حاولنا نخليهم يختاروا، عشان محدش يطلع يقول إننا بندخلهم فى السياسة، واتفاجئنا أنهم اختاروا اسم: كورال تحيا مصر».