العرافة لشريف إكرامي: «كنت عاوز تكسر عيادة دكتور ومراتك منعتك»
![شريف إكرامي](https://watanimg.elwatannews.com/image_archive/840x473/9542530191619383612.jpg)
شريف إكرامي
واجهت «العرافة»، شريف إكرامي حارس مرمى نادي بيراميدز، بشجار نشب بينه وبين طبيب في منطقة مصر الجديدة، إذ قالت له: «مين الدكتور اللي كنت عاوز تكسر عيادته والمدام منعتك؟».
وقال إكرامي، في حواره مع الإعلامية بسمة وهبة مقدمة برنامج «العرافة»، الذي يعرض عبر شاشة «المحور»: «كنت عاوز متخانقش، لكن أتحدى إن أي أب مكاني كان ممكن رد فعله يبقى أصعب 1000 مرة، وهم طبيبين لابني ياسين، والثاني لابنتي آسيا، الأول عيشني ومراتي 8 شهور من الألم النفسي، قالي مينفعش الحمل يكمل لأنه في الأسبوع الـ11 عمل تحليل، وقال إن الولد هيبقى مصاب بمتلازمة داون، فصدمت، وكان مصمم إننا ننزله، وقعدت 8 شهور في عذاب، لدرجة إني رحت عملت عمرة».
وتابع: «كان عندي شواهد علمية تنفي هذا الكلام، وكنت متوتر وخايف، إن الموضوع يطلع صح، وكان عندي إحساس داخلي إن الحمل سليم، وربنا نصرني، وأول ما خرج من غرفة العمليات وحملته بيدي، بكيت رغم إني مش بعيط بسهولة، وحسيت إن اللي عيشته في 8 شهور حمل من زوجتي خرج مع ولادة ياسين».
وأوضح، أن اختبار الله له في ابنته أسيا كان أشد قسوة: «ابتلينا فيها منذ بداية الحملة، والابتلاء الأكبر كان بعد ولادتها، ورحنا لأستاذ مينفعش يتقال عليه دكتور، لأن الدكتور لازم يبقى عنده ضمير، لأنه عمل تقرير إنها عندها مرض صعب جدا وكان عندها 5 شهور، وقال تعمل عملية وتاخد دواء للصرع».
وواصل: «أرسلنا الإشاعات لإنجلترا وطلبوها فورا قبل 48 ساعة، وكان عندي ماتش الزمالك بعدها بأربع أيام، وطلبت من النادي في وقت رئاسة محمود طاهر، واستخرج لي أحمد سعيد الفيزا بسرعة البرق، وعملت كل الفحوصات وفي الآخر مستني النتيجة كأنه امتحان حياتي، وفوجئت إن مكنش فيها أي حاجة.. ومن هنا جات لي الحرقة، إني أوصل للدكتور إنه لازم يبقى عنده ضمير أكتر من كده».