عمرو أديب عن أزمة فريقي الشباب بالأهلي والزمالك: هو مش فيه قانون للعبة
أديب: إزاي فرقتين الاتنين بيقولوا أنا اللي كسبان؟ هو فيه كده؟
الإعلامي عمرو أديب
علق الإعلامي عمرو أديب، على أزمة فريقي الشباب بالأهلي والزمالك مواليد 1999، قائلا: «حصلت حاجة غريبة جدا، ماتش للأهلي والزمالك مواليد 99، الماتش خلص والزمالك اتغلب 1-2، والزمالك والأهلي طلعوا من الماتش كل واحد فيهم طلع وبيقول أنا اللي أخدت الدوري، بس مش دي القضية».
وأوضح «أديب»، خلال برنامجه «الحكاية»، المذاع على شاشة قناة «mbc مصر»، «القضية أن لاعيبة الزمالك قعدت تغني في غرفة الملابس أغاني مسيئة للأهلي، فطلعت على السوشيال ميديا، فالأهلاوية زعلوا، ودول شتموا، حدوتة غير طبيعية، أنا عاوز اسأل سؤال غريب شوية هو مش فيه قانون للعبة دي؟ إزاي فرقتين الاتنين بيقولوا أنا اللي كسبان؟».
وتابع: «دايما بنقول إذا تساوت النقاط بيبقى في الأهداف، ولو تساوت في الأهداف يبقى اللي جاب أكتر، أظن بيبقى فيه لايحة بتقول كده، هل في الدنيا كلها فيه فرقتين يبقوا خارجين من ماتش والاتنين بيقولوا أحنا اللي خدنا الدوري.. هو فيه حاجة كده؟».
وأكد مصدر داخل اتحاد الكرة، أن فريق شباب النادي الأهلي 99 توج بلقب البطولة وفقا للائحة الخاصة بدوري الجمهورية للشباب مواليد 99، التي تنص على أن المواجهات المباشرة تحدد بطل الدوري.
ونجح فريق الشباب لكرة القدم بالنادي الأهلي في الفوز على ضيفه الزمالك، بهدفين مقابل هدف، في المباراة التي أقيمت اليوم، على ملعب الأهلي بمدينة نصر، ضمن الجولة التاسعة والأخيرة من المرحلة النهائية لدوري الجمهورية للشباب التي تضم خلاف قطبي الكرة المصرية فرق الإسماعيلي والإنتاج الحربي وسموحة والمقاولون العرب وبيراميدز وسيراميكا كليوباترا وإنبي.