الرقابة الشعبية تواصل حملاتها: «خليها فى الموقف».. لمواجهة جشع سائقى الميكروباص
حملة لمقاطعة الميكروباص فى الهرم بسبب التلاعب فى التعريفة
«خليها فى الموقف»، شعار رفعه أهالى منطقة الهرم، وذلك عقب سيل من الحملات التى انتشرت فى الفترة الأخيرة تحمل كلمة «خليها»، مثل «خليها تعنس»، «خليها تصدى»، «خليك فى حضن أمك»، والهدف من الحملة مواجهة جشع سائقى الميكروباص فى منطقة الهرم.
مدحت عبدالتواب، أحد القائمين على الفكرة ومن سكان منطقة العروبة بالهرم، طالب هو وأهالى منطقته سائقى الميكروباص مرات عديدة بالرحمة بهم وخفض قيمة تعريفة الميكروباص، لكن نتيجة لعدم الاستجابة لهم وتكرار الاستغلال من قبل السائقين أطلقوا الحملة لوقف التعامل معهم: «السواق بياخد أجرة 3.5 جنيه وساعات أكتر فى المسافات القصيرة، ودى المفروض تكون الأجرة من أول محطة مشعل لحد ميدان الجيزة حتى لو راكب ونازل فى نص المحطة بيتحاسب على الأجرة كاملة».
فكر أهالى المنطقة فى فكرة أخرى كحل بديل مؤقت وهى فكرة التوصيل الجماعى حتى تنجح فكرة المقاطعة: «اللى معاه عربية من الجيران خلال الفترة دى بيوصل فيها باقى الجيران عشان طول ما لسه فيه حد بيركب مع سائقى الميكروباص الحملة مش هتنجح ومش هتعمل أى صدى». يأمل «مدحت»، خلال الفترة المقبلة، فى انضمام أكبر عدد من سكان المنطقة لفكرة الحملة: «لو كلنا تعاونّا والعدد بقى أكبر الحملة هتحقق هدفها، إحنا كل اللى مش عاجبنا السواقين اللى بيقطعوا الأجرة على مزاجهم ومش بيرحمونا». «الحملة مش هتغير حاجة.. إحنا مش بنستغل الزبون»، كلمات معتز على أحمد، سائق بأحد المواقف فى منطقة الهرم، والذى يوضح أن الزبائن لا يمكنها الاستغناء عنهم: «انا معاهم إنهم يقاطعوا السائقين اللى بيقسموا المسافة وياخد الأجرة ٣ مرات فى الطريق.. لكن أما الأجرة تكون ثابتة طول الخط ده ميزعلش حد.. حقى وحقه».
إقبال المواطنين متوسط داخل موقف سرفيس الهرم، حالة رصدها ناصر أبوجودى، أحد سائقى الميكروباص: «الأجرة هنا فى الموقف موحدة وثابتة من أول الخط لحد آخره بـ٣٫٥ جنيه وفيه ميكروباص بيروح من الجيزة لمشعل دائرى ده بياخد ٥ جنيه».. على مدار الـ٩ سنوات الماضية شهد الموقف ارتفاعات متتابعة فى تعريفة الأجرة: «إحنا بنراعى الزبائن، فيه عربيات بتحمّل من بره الموقف بتقسم الأجرة من الجيزة للطالبية بـ٣٫ ٥ ويكمل من الطالبية للرماية ومشعل بـ٣٫٥ تانى، بس ده مش عندنا دول بره الموقف عاملين زى القشاش».
وبحسب «ناصر»، فإنهم تعرضوا للكثير من حملات المقاطعة خلال السنوات الماضية لكنها لم تغير شيئاً: «الناس عاجبها التريند كل شوية حاجة مش عجباهم يعلنوا مقاطعتها، إحنا شعب بيحب يركب الموجة»، مؤكداً أن الإقبال أقل خلال هذه الفترة بسبب إجازة نصف العام: «إحنا شغالين على الناس اللى بتخرج للفسحة فى الإجازة».