كريم «متمرد» فى «المترو»: ثورة الجياع 28 يونيو
![كريم «متمرد» فى «المترو»: ثورة الجياع 28 يونيو](https://watanimg.elwatannews.com/old_news_images/large/113718_660_3132712_opt.jpg)
«أنا جعان.. أمن وصحة وتعليم وعمل»، صرخ بها حتى بُحّ صوته داخل محطة مترو الشهداء، نظرات المواطنين على جانبى المحطة تتفحصه بإمعان، البعض يضرب كفاً بكف «ما كلنا جعانين»، وآخر: «قلّبت علينا المواجع يا أخى».
لكن الشاب كريم سيد البدوى محمود، لا يعبأ بنظرات المارة ولا تعليقاتهم، ويوجه رسالة بعنوان «الجياع قادمون»، يقول فيها «إلى الرئيس الحاكم وجميع النخبة السياسية وإلى ضعاف البصر والبصيرة، انتظروا يوم الجياع آخر جمعة فى أول سنة رئاسة لتسمعوا وتشاهدوا زئيرهم فقط».
«كريم» مصاب بعجز فى قدمه إثر حادث أليم انتهى بتركيبه 6 مسامير فى قدمه «كنت شغال فى شركة للدعاية والإعلان وبعلق صورة للبابا شنودة وفجأة وقعت ومن ساعتها وأنا بتعالج».
ويتابع «كريم»: «مضيت على استمارة تمرد بس وهننزل يوم 28 يونيو، وهنستنى الناس وبنقول لهم اتقوا شر غضب الجياع، ثورتنا هيعملها العمال الشقيانين والناس المطحونين فى الشوارع اللى إيديهم من الشغل اتشققت ووشها اتجرح من الشمس».
تيار الإسلام السياسى كما يراه كريم ينقسم إلى «أول مذهب بتاع أتباع حسن البنا ودا مذهب سرطانى ربنا يكفينا شره، والتانى لأولاد الظواهرى وده تكفيرى جهادى، والتالت بتاع أولاد الزمر وعاصم عبدالماجد وده مذهب إرهابى قاتل والأخير بتاع أولاد أبوإسماعيل وده مذهب عنترى نتاش هجاص محدش بيسمع له»، يوجه كريم رسالته للإخوان «الدعوة دى مش فردية ولو انتم 5 ملايين إخوانى.. إحنا 35 مليون جعان».