م الآخر| هتتخلع يا معلم.. خُلع "بارتى"

الطرف الأول: ألو هاى، إزيك أخبارك إيه؟، أحنا النهارده عاملين "بارتى" كبير وعازمينك عليه، ياريت تيجى من بدري علشان فية "سيربرايز" كتير". الطرف الثاني: مين عامل البارتى، ومين دول اللي عازمنى، وبمناسبة إيه؟ الطرف الأول: بليز اسمعيني أكمل كلامي. الطرف الثاني: كملي يا ستى، كلى أذان صاغية. الطرف الأول: أنا وستة من الفريندز عاملين "بارتى" كبير وعازمين كل "الفريندز" بتوعنا. الطرف الثاني: عرفت عاملين حفلة، بس بمناسبة إيه؟ الطرف الأول: بليز "ليسن تو مى"، إنتي عارفة إنى إتجوزت الصيف اللي فات من شاب إتعرفت عليه على "الفيس"، واتقابلنا وحبينا بعض واتجوزنا. الطرف الثاني: آه أنا فاكره ربنا يهنيكوا ببعض، أنا فاكره فرحكوا كويس، نص مطربين البلد ورقاصاتها حضروا، وكان فىه شخصيات عامة كمان، هى "البارتى" بمناسبة عيد جوازكم. الطرف الأول: لا أنا خلعته خلاص، وعاملة خلع "بارتى" أنا وصحابي، أصلهم خلعوا خلاص وناويين يشاركوني "البارتى". الطرف الثاني: ليه هو طلع بخيل ولا طلع عينه زايغة. الطرف الأول: ياريت. الطرف الثانى: أمال طلع إية؟ الطرف الأول: الغشاش النصاب طلع خريج جامعة حكومي، وضحك عليا وخدعني ومقاليش إنه متخرج مع العيال البيئة من جامعة حكومي. الطرف الثاني: وفيها إيه لما يكون خريج جامعة حكومي، مش فاهمة وجهه نظر سيادتك في الموضوع. الطرف الأول: اكتشفت بعد الجواز إن طريقنا مش واحد، بينا فروق كتير وخلافات علمية وفكرية. الطرف الثانى: بس الخلافات العلمية والفكرية بتيجى لما بيكون المستوى الثقافي مختلف والثقافة عمرها ما كان لها علاقة بنوع الجامعة، وإلا مكانها وأنت وجوز على نفس المستوى التعليمي. الطرف الأول: لا إنتي فاكره إنه علشان معاه شهادة معلقها على الحيطة، وفخور بيها إنه كده يكون على نفس مستوايا، الفرق كبيير بينا. الطرف الثانى: بس دى ممكن خلافات بتحصل فى أول سنة جواز ومتعارف عليها بين الناس. الطرف الأول: "نو واى" إني كنت أكمل معاه، ده مش من مستوايا ودي غلطتي من البداية إنى أرتبط بخريج جامعة حكومي. الطرف الثاني: طب أنا عرفت إنتى خلعتيه ليه، والخمسة الباقيين خلعوا ليه؟. ما هى دى المفاجأة نفس السبب إحنا قررنا نخلع "إن سايم تايم". الطرف الأول: طب أصحابك متجوزين من إمتى. الطرف الثاني: في منهم متجوز من أربع شهور وفى ناس تانية من أربع سنين في "الرينج" ده، متتأخريش "أوك باى".