م الآخر| هتتخلع يا معلم

"إذا كنت لا تتحدث اللغة الانجليزية بطلاقة، فاحجز مقعدك بين المخلوعين"، من فضلك ماتبحلقش كتير للخبر عادى، فيها ايه يعنى، هتيجى على الجواز وتقف، ما هو مطلوب منك إنك ترطن بالإنجليزي على أي حاجة، هتيجى عند الجواز يعني. مش مصدقنى، طب اسمع، واقرأ معايا بتركيز، وشوف العريس إتخلع إزاى، أصل الحكاية بدأت بالإنجليزى، وزى ما إنتوا عارفين إن اللى يبتدى بحاجة لازم ينتهى بيها. "هو" كان في مؤتمر، وكان عمال يتكلم بالإنجليزي، "هي" شافته من هنا وسخسخت وداخت، هو دة فتى أحلامها اللى هيخدها على "بى إم دبليو" البيضا، أصل الحصان الأبيض راحت علية بقى. "هو" شافها من هنا قال هى دى فتاة أحلامه، واتفقوا على كل حاجة، وتم الجواز، طب إية اللي حصل؟ صحى من النوم بعد شهرين، لقى دعوى خلع، إزاى دة حصل، دول لسه متجوزين وما كملوش شهرين، ولسه جايين من شهر العسل، طب ليه الخلع. أصل الزوجة الغلبانة يا عينى عليها ملت من الحياة الزوجية، لأن المتوحش مش بيعاملها بخشونة، ومش بخيل لا سمح الله، بالعكس مش حارمها من حاجة. الكارثة والمصيبة اللى زلزلت حياتهم، إنه بيكلمها بالعربى، ومُصِر إنه يكلمها بالعربى طول الوقت، والغلبانة مستحملة كلماته العربى وقلبها بيتقطع، وودانها مش قادرة تستحمل الكلمات العربى. والغلبانة فضلت مستحملة شهرين بحالهم، وصابرة، بتحاول تقنعه يغير العادة السيئة دى ويكلمها بالانجليزى، لكن مفيش فايدة، وفى يوم عيد ميلادها ووسط أصحابها المشكلة اتفجرت. فى عيد ميلادها عملها حفلة كبيرة فى فندق كبير، وعزم كل أصحابهم، وحب يجامل ضيوفه ويتكلم معاهم تعرفوا عمل اية وقال ايه، رحب بيهم بالعربى، يا أهلا وسهلا، إزيكوا، عاملين اية شرفتونا، الخ، اعتبرته المدام إهانة كبيرة وفضيحة في وسط أصحابها، وأخدت هدومها وعلى بيت "دادى" على طول، ومن الـ"مورننج" رفعت قضية خلع. العروسة ردت كل حاجة بعد شهرين عشان كلامه مش عاجبها، بيتكلم عربى، ليه سبب وجيه للخلع، هو احنا عايشين فين، ولا نمنا وصحينا لقيناهم غيروا لغتنا واحنا مش عارفين. وصحينا الصبح لقينا الخبر منشور: "قضت محكمة الأسرة بخلع زوجة من زوجها، لأنه لا يتحدث معها باللغة الإنجليزية داخل شقة الزوجية‏، ورفضت الزوجة كل محاولات الصلح‏".‏ بس للأسف الخبر ماقلش المهر كان كام، واترمى على جزمة ماركة إية.